الفلكي انشكاين

( 21 مارس / 22أبريل )
عين الحسود لاتسود رد بالك المخلوق العجيب راك متبوع من طرف عشاق التحنزيز والتبركيك، مارس راه لوكو كلشي فيه مقلوب وانت هاوي الدوران بالليل فالزناقي، العاقة عندك موجودة مول الحانوت باغي فلوسو، جاتك صفة التمساح.
( 23 أبريل / 20 ماي )
العضلات بانو عليك جات معك الرياضة، لحبيبة عندك راسها قاصح وكتجري فالخاوية بلا قياس، المكسي بمتاع الناس عريان، ريحتك عطات مع الطلبة رد بالك، جيبك خاوي وكرشك جارية القضية عندك حامضة وبزاف هاد السيمانة عطاوك صفة بانتشي.
( 21 ماي / 21 يونيو )
الله معك هاد السيمانة كانت فطريقك واحد المصيبة فشي شكل، صحاب الخاوية غادي يخرجو عليك زير راسك، لحبيبة بغاتك تجي للدار راها عيات من لقهاوي والدوران فالزناقي، الباطرون طالع ليه الزعاف منك وصلو خبارك العفريت، تستاهل لقب المقاول.
( 22 يونيو / 22 يوليوز )
إيلا مشا الزين تبقى حروفو ويلا مشاو لفلوس يبقى لكريدي، جيبك راه فالعناية المركزة والحب عندك كيطير فوق السحاب، حياتك فيها شي سيركوي محروق، كاين شي فرصة فالطريق عندك تخلّى عليها، الوالدة راضية عليك من طنجة لمرتيل، هاد السيمانة راك مقبول.
( 23 يوليوز / 22 غشت )
برافو عليك درتي بالنصيحة وراك باين ماشي فالطريق الصحيحة، كترة الدعايات غادي تخليك زيرو، تفارق مع لبنات راه لحبيبة عندك كتبغيك وطالع ليها الدم من فعايلك، الفايسبوك خلاك لا نعاس لا خدمة بحال الناس، كنت السبع وهاد السيمانة راك الضبع.
( 23 غشت / 22 شتنبر )
مواليد برج العزبة فيهم المعقول وغالباهم العاطفة ولكن متبوعين من وجوه الويل، رد بالك من الناس لقرابين عليك راهم سباب تعاستك، الحب بين يدك شوف قدامك المصيبة، الوالدين توحشوك بزاف بحالي راك فالموزمبيق، زير السمطة وجاتك صفة السفير.
( 23 شتنبر / 22 أكتوبر)
حياتك بدات تزيان غير تفارقتي على داك المجموعة العشوائية، الوالدة بغات تفرح بك قبل ما تمشي للخارج، الخدمة عندك مزيانة فيها الراحة والعاقة والباطرون ناوي يعطيك شي فرصة واعرة كن فالمستوى، ورد بالك من الثعلب صاحبك، هاد السيمانة راك المسعود.
(23 أكتوبر / 21 نونبر )
العقرب كيبان درويش ولكن فعايلو من تحت التبن وراه قنبلة موقوتة، سمع لكلام اللي يبكيك ماشي اللي يضحكك راك راجع اللور، شوفلك شي خدمة تنسيك الدوران فالزناقي وجيبك يشوف العاقة، وجهك ماشي وجه الحب لبرودة كتردك بحال فايفة، راك الخايب.
( 22 نونبر / 19 دجنبر )
الشيشة خرجات عليك وانت صحتك راشية عزيز عليك الشطيح ولقصاير نهار يجي المعقول تلقى راسك صفر درهم، الحب نسيتيه من بالك وهو داير بك مول المحلبة بغاك فشي مهمة فيها الربح ولكن عامرة منعرجات، الوالد وصلاتو ريحتك، هاد السيمانة راك الشيباني.
( 20 دجنبر / 19 يناير )
السلطة مزيانة ولكن أحيانا كتكون ضد المصلحة، النعاس جا معك قريب تولّف عليه نوض تحرك باراكا عليك من الشخير، الحب غادي يجيك بدون سابق إنذار وشي خبر فشي شكل داير عليك فالحومة ريحتو جات من تويتر، عطاوك صفة السعداني.
( 20يناير / 18 فبراير )
عقلك مزيان كتعرف كيف تجيب لفلوس وعارف مصلحتك ولكن الغلط الوحيد ديالك صحابك، حاول تغيّر السّيستيم وشوف شي بنت زوينة بني معها المستقبل وتفارق مع ولاد الليل ولا غادي تندم، مول التليفون عاود خبارك لشي ناس عينهم عليك، جاتك صفة القرصان.
( 19 فبراير / 20 مارس )
الزربة خرجات عليك والشيطان لاصقك بحال لعكس، ولد الناس بغاك فلحلال ولكن أنت ماشي ديال المعقول، نوض خدم وجمع راسك وتهلاّ فالوالدة التليفون للّي عندك هو سباب المشاكل بدّل النمرة وتفارق مع وجه الكمّيرة، هاد السيمانة جاتك صفة العلبة الصوتية.
** يشو رشيد **
- بريس تطوان -