الفلكي انشكاين

( 21 مارس / 22أبريل )
النية أبلغ من العمل الكبش، عينك خرجو بحال السردين البايت فالصندوق كيبان لك الدرهم كتنسى فين ساكن، نوض خدم على راسك الصيف ولعواشر قريب توصل، جيبك خاوي بحال راسك والحبيبة ناوية تبدلك ريحتك عطات من بعيد الطبيعة.
( 23 أبريل / 20 ماي )
الزهر اللّي هرب على البارصا جا لعندك عرف كيف تستغل الفرصة، الشريفة مرتاحة معك وناوية المعقول جمع راسك وزير السمطة، مول لكريدي كيفتش عليك عطيه رزقو إيلا ناوي تبدا من جديد وتفارق مع لحديد والدعايات الخاوية.
( 21 ماي / 21 يونيو )
نهار تفاهم مع الحب ديالك غادي تعرف علاش المعقول كيعيّش، بقيتي تابع العامرة حتى فاتك الطوبيس وبقيتي لا ديدي لا حب لملوك، الباطرون كيفتش عليك ناوي يرجعك تخدم، شي خبر فشي شكل داير عليك فالحومة تفرشيتي، عوم فبحرك.
( 22 يونيو / 22 يوليوز )
جيبك فالعناية المركزة وانت معوّالشي تخدم وتجمع العاقة، التدخين مضر بالصحة وما فيه حتى شي فايدة، لامور ديالك عاطيها غير للفايسبوك والواتساب، نصيحة لله تفارق مع زيتونة وشوف شي حاجة تحمّر لوجه، النحس تابعك بحال إنييستا.
( 23 يوليوز / 22 غشت )
اللبؤة عاطياها ليام الخير موجود كلشي من عند العاشق المجنون، الأسد عاطيها للنعاس مجايب للدنيا خبار، الحانوت مشدودة والفايسبوك ديما أون لاين، لحبيبة ناوية تخلّي الغابة بحال الدومينو نوض جمع راسك السبع عندك يضحكو عليك لقرودة.
( 23 غشت / 22 شتنبر )
غير تبدا الشمس تسخون تشوف العذراء بالميني وسبيدو نوض جمع راسك عندك يحسبوك مع المشرملين، لحبيب عندك مغانن وناوي الزواج رد بالك يعيق بك بسرسبك من البطولة، تفارق مع صاحبتك غادي تخرجلك على حياتك رد البال.
( 23 شتنبر / 22 أكتوبر)
عبدو مول السيبير طلعتيلو فالراس كل ساعة معه عطيه التيساع، الحب ديال الفايسبوك ديما فيه المراوغات بحال كريستيانو رونالدو، الوالدة عاقت بك سمحتي فالقراية وكدّور فالزناقي من سوق لسوق، عندك مستقبل فالتمثيل على صحابك.
(23 أكتوبر / 21 نونبر )
قالك كل بشهوتك ولبس بشهوة النّاس، باينة عليك العصبية هاد الأيام متقلقش خبار الخير كيفتش عليك، الخدمة غادي تجيب نتيجة زيّر راسك وصبر، الحب مكاينش فبالك ماعندك ما دّير به هاد الساعة، نهار يجيك خبر الزواج مدورش موراك.
( 22 نونبر / 19 دجنبر )
نفسيا بدات الرّاحة تبان عليك، زيد صبر باش توصل لازربة على صلح كلشي عند الله قريب، مادّيا ماكاين حتي شي تغيير من غير لكريدي كيف ديما، أمّا عاطفيا الحبيب جامع راسو وناوي لحلال وراه كيراقبك من بعيد رد بالك عندك طيح فالفخ.
( 20 دجنبر / 19 يناير )
الجدي معروف بالحكمة والصبر حاول تنازل المسامح كريم، فهاد الوقت كلشي فالصّالح ديالك ماديا ومعنويا من غير الحب للّي شاد معك العكس حيت وجهك ماشي وجه الحب تهلاّ فصحتك ونعس بكري، شي ناس فشي شكل عينهم عليك.
( 20يناير / 18 فبراير )
لعياقة ساهلة باللسان آسي أيوب ولكن بالعمل صعيبة، ماديا ماكاين مايتقال اللهمّ شي دريهمات بقاو من العام الفايت، الحب طالب معك الشرع شيماءعاقت بك كتدي وتجيب فيها على حاجتك، صاحبك بدر شام فيك ريحة لغدر وناوي يطرطق الرمانة.
( 19 فبراير / 20 مارس )
راه كاين فرق بين لفهامة والكلخ وبجوج ما فيهم فايدة، صحتك مزيانة وفيها توازن، القلق بزاف غادي يجيب لك مشاكل مع صحابك فالمدرسة برّد دمك، عليك بشي رحلة لأقشور بدّل الروتين ونسى الهم ينساك، الحب فرص مشا واحد يجيو عشرة.
*رشيد يشو*
**بريس تطوان**