أبراج الفلكي انشكاين 2016

( 21 مارس / 22أبريل )
الحياة أخذ وعطاء واللّي زربو ماتو، عطاك الله الصبر واخا العاقة قليلة الخير فالطريق، الحب ربحتيه ومعندك عليه فراق وراه كيبغيك وصابر معك، تفارق مع السهير راه مضر بالصحة وباراكا عليك من زي ألوان.
( 23 أبريل / 20 ماي )
الغاية تبرر الوسيلة مالك زربان كتر من لقياس، خد ماعطاك الله البرهوش حياتك مقلوبة بحال سبونج بوب، ناقصك غير الحب اوجه الغول ديها فقرايتك راك لازين لامجي بكري، الفايسبوك خلاك مجلوق بحال لبنى السريعة.
( 21 ماي / 21 يونيو )
اللّي زرع الريح كيحصد العاصفة، الناس كتقرا باش توصل وانتوما بجوج حاضيين التبركيك والطالع والهابط، الزهر عندكم فالخدمة الدرهم موجود ولكن الراس الله يجيب، تفارقو مع الحب راه ماشي دوجهكم.
( 22 يونيو / 22 يوليوز )
لكريدي تقال عليك أبوجنينة زير السمطة شوية، الخير فالمساعدة ماشي فالعداوة، لحبيبة كتبغيك وخايفة عليك بزاف تهلا فيها، رد بالك من السهير راه خرج عليك، صحتك راجعة اللور كتر من لقياس هاد السيمانة راك عيان.
( 23 يوليوز / 22 غشت )
السلطة قريب تزول من يدك الثقة الزايدة كتقلب على مولاها، باراكا ما ضحك على بنات الناس راها تجي فيك مضوبلة، ميديتل خرجات عليك لا صحة لا فلوس بحال العتروس، الوالدة عايقة بك والوالد وصلو خبارك رد البال.
( 23 غشت / 22 شتنبر )
ريحتك وصلات رد بالك من الفايسبوك راها تجي فيك نيشان، شي ناس عينهم عليك فشي حساب قديم اللهم اني بلّغت، مول الحانوت بغا لكريدي ديالو وصحابك عرفو حقيقتك، الحب فيدك ولكن المخالطة بزاف كتجري عليه.
( 23 شتنبر / 22 أكتوبر)
التوازن ضروري فالحياة ولكن يكون فالمعقول ماشي فالتخرويض، العايات الخاوية ما فيها نفع سعد لمجرد راه غير كيخربق بلا ما تساعفو، الحب جايبلك فرصة ذهبية عرف كيف تستغلها وتفارق مع مول التليبوتيك راه فاشل.
(23 أكتوبر / 21 نونبر )
لفهامة بلا قياس موراها غير لخوا الخاوي، قرايتك مشات مع تسونامي راسك خاوي وكرشك جارية، الحب خاص بمواليه المسموم وجهك ديال لهراوة، عليك بشوية دالرياضة راها مفيدة للقلب هاد السيمانة راك مهبول.
( 22 نونبر / 19 دجنبر )
كثرة الدعايات كتلف القبلة، ديها فشغلك قبل ما تخسر كلشي، صحابك باغيين فيك المصلحة وعينهم فرزقك، الحبيب خايف عليك ونهار يهرب عليك مينفعكش الندم، شي خبر فشي شكل داير عليك فالحومة عوم فبحرك.
( 20 دجنبر / 19 يناير )
بالجد والاجتهاد قريب تسيطر على ملك الحيوان راك خدام وقايم بالواجب ديالك، بون كوغاج زير راسك، الوقت مواتيك باش تكمل دينك توكل على الله، العاقة موجودة ولعقل كاين هضر مع الوالدين وشري القالب.
( 20يناير / 18 فبراير )
نقطة بنقطة يحمل الواد ماشي السطل، سامح فالمعقول وتابع لخوا الخاوي غتجيبا فراسك العفريت، الوالدة بغات تشوفك لفوق وانت باغي تكون لتحت، لبنات خرجو عليك وراك معروف غير بالإشهار، وجهك ماشي دالحب.
( 19 فبراير / 20 مارس )
الصيادة موجودين ولبحر فيه الخير، خليك مع واحد عندك تبقى لا ديدي لا حب لملوك، شي خدمة كتقلب عليك عطيها فرصة وكن راجل، صاحبتك كتبغيك وراها بنت الناس وتسستاهل كل خير، هاد السيمانة جاتك صفة الحيران.
**يشو رشيد**
- بريس تطوان -