في ألبومي صْوَرِْ كثيرة

عبد الستّا زرّوقي
فِي ألبومي صُوَرْ كْثيرَة..........كلْ صورَة تَحْكي أحْلامي
هَاذي صورة وَانا ْصغيرَة.........فيها الدّنيا زْهِتْ قدّامي
تْعبّرْ عْلَى حاجاتْ غْزيرَة.......أغْلِبْها كانتْ في مْنامي
لا كانت حْياتي مَريرَة...........أميرة وْعنْدي خدّامي
عِشْتْ في حْياتي مُثيرة...........الدّنيا نْدوِّرْها بابْهامي
لاعنْدي شكْ وْلا غِيرَة .........لا نَجْرِحْ غيري بِكْلامي
**********
وْهَاذِي صورة وَانا كْبيرَة........تْلخِّصْ ماشُفْتُو في فْْلامي
فيها المُخْرِجْ حَسَنْ السّيرة.........وَانَا البَطْلة جُرْحي دَامي
القصّة تحْكي عْذاب وْحيرة.....نرْويها تَنْضُبْ أقلامي
فوقْ جْمالي عْملْتْ جْبيرَة.......كِيفْ دارتْ عْليَّ أيّامي
عْطيتُو الثّقة والتّأْشيرة......صْبَحْ مِتْحَكّمْ فِي زْمامي
تْعرِّيتْ/ جُعْتْ/ عْمَلْتْ دْوِيرَة....تًسْتُرْني وتْرَتَّحْ عْظامي
تْناسيتْ زْمانِي وْتقْديرَهْ......عَرَّفْنِي بْوَاحِدْ حَرَامي
كْلا (الرَّيْ ) بِ(المُوجِيرَة).......زادْ لَحَسْ كُلْ ما قُدّامي
عَرْقِي خْسِرْتُو في تَقْمِيرَهْ......خَلَاّنِي غَاطْسَة في ظْلامِي
زَادْ قَصّْ عْلِيّ دْنانِيرَهْ .......لِصْغَارَهْ جاهْلِ الْأسامي
فاطْمة يْناديلْها مُنيرة.........والعادِلْ يْقُلُّو يا سامي
قْلَمْ وْلوْحة وْطباشيرة .......حْفايا قدّام ِالأقْسامِ
عانِيتْ سِكْرَهْ وْتبْذيرهْ..... لا نعْرِفْ بارِدْ لا حَامِي
حْكُمْ عْلَيَّ بْتَقْتِيرَهْ .......نِمْشي نِخْدِمْ وْهُوَ( ْيِرَامِي)
وَانَا فْْرَاشِي جَرْدْ حْصِيرَة......نََكِّسْتْ لِلذّ ّلْ أعْلامي
مِنْ بَعْدْ تْعَبْ الحَضِيرَة.......يْبَاتْ واقِفْ وِلْدِي رَامِي
وِيذَا تْجِي لِيلَة مْطِيرَة .......نْوَلِّي نْبَحَّرْ طُولْ مْنَامي
زادْ تْعَرِّفْ عْلَى سَمِيرَة......قَلِّي ماعُدْتِشْ (مَدَامِي)
وِلِّي يَعْطِيهْ ضَمِيرَهْ ......زَايِدْ مْعَاهْ كُلْ كْلامي
ماغايضني كان صْغِيَرهْ....رْضَعْ الهَمْ قْبَلْ فْطامي
بِِعْتْ الضُّحْكَة للتّكْشِيرَة....ثْرَِسْمِتْ َعْلََى شْفايْفي آلامي
هذا إلّي يْخالِفْ تَفْكِيرَهْ......يْبيع شْهَايْدَهْ للْغَرَامِ
نْصِيحَة مِنِّي لْكُلْ غْشِِيرَة......ماوِية عْلى دْخُولْ الزِّحَامِ
بالجهْلِ تْعِيشِي أسيرة......توصِلْ حْياتِكْ لِلْإعْدَامِ
بالعلْم تْكُونِي الأميرة .....ليكِ تَعْظيمي وْسَلامي
أَلْبُومِي في قصّة قْصيرة.....يْجي حْكاية للإعْلام
**مع تحيّات
(عبدالسّتّار زرّوقي)
القيروان
تونس