لوليدات ليكايعرفو يحسبُوها...

واش كتعرفو 'سحت الليل'. كتعرفو خصايلو؟ واخا تعرفوه ما يوصلش خصايل دوك اللي بانوا فالحراك السياسي و الإجتماعي بالمغرب منذ الشهور الأخيرة، فأكيد منين بدا الربيع العربي فتونس، و بعض الشباب المغربي بغاو يطمحو حتا هما للتغيير و محاربة المفسدين.

و هكذا جائت حركة 20 فبراير المطالبة بمحاكمة و إسقاط رموز الفساد، خصوصا الناس اللي فالمسؤولية و كيتراسو مجموعة من الأحزاب سواء إدارية او ديمقراطية. و من بعد ما أكدنا فوقت سابق بلي هاذ حركة 20 فبراير ركبات عليها مجموعة من الشخصيات و كذا الهيآت السياسية والنقابية و المدنية .

بان بلي المغرب بقيادة الملك و معاه الشعب طبعا انخرطوا فهاذ الحراك و اعملوا اليد فاليد من أجل التغيير، و القطيعة مع العهد البائد ، و بالتالي محاولة إقحام الشباب فاللعبة السياسية. و أغلب المغاربة استحسنوا هاذ الخطوة ، خصوصا من بعد المصادقة على الدستور.
لكن اتضح من بعد أن الناس اللي قالتلهم الحركة ديال 20 " ارحل " كل واحد فيهم عندو ولد حريمي واخا ما ولدوش " طبعا هاذو هما السحاحت الصغيورين.

و تعريف ديالهم هم ذاك الناس اللي كيغتنيو على ظهور العباد فوقت الحرب و الازمات و ما شابه ..." و هكذا تفتقت عبقرية بعض الشباب، و بغاو يسوقو المغرب بلاصت بواتهم اللي ما و لدوهومش ، باش يديرو لاباس و ماشي باش يخدمو المغرب.

و الأمثلة كثيرة ، ها اللي بغا يأسس حزب و سما راسو بالربيع الديمقراطي ، و ها حنا على أبواب الخريف ، ها اللي دار جمعية و سماها كفاءات من أجل المغرب ، و هما ما أكفاء ما والو ، و أخرى حركة الشباب من أجل الإنصاف و الديمقراطية ، و هو ما ناصفش حتى راسو عاد أقرب المقربين ليه .

بصريح العبارة هاذ الناس بغاو يستحمرونا و يسميو ريوسهم بالإصلاحيين ، وهم فالأصل من كبار المفسدين.

لذلك خاص المغاربة يديروا يديهم فيد بعض ، و يفكروا فمستقبل المغرب أولا و أخيرا باش يقطعوا الطريق على هاذ الأجنة اللي ولداتها أرحام أمهات لا تعرف لهم أباء .