مقال اسبوعي يُكتب عُنوة بالدارجة المغربية على تازاسيتي حزب العدالة و التنمية، و منين بان ليه بلي جميع الإنتخابات ماشا تعاود، بان ليه الوجه الآخر، و بقا طامع فالزعامة ديال كولشي، سواء الحكومة أو المجالس، هادشي علاش بدا كيدير السياسة .
و نتمناو أن هاذ السياسة تعود عليه و علينا بالخير، خصوصا أنه أصبح الحزب المراهن عليه فظل الظرفية الحالية سواء المغربية أو التازية على وجه الخصوص.
و ربما هذا اللي خلانا كنسمعوا على الخرجات ديالو فالمدينة من ناحية القرب من الأحداث أو من خلال المناقشات ديالو الحادة فالإجتماعات ديال اللجن اللي كتهيأ لدورة الحساب الإداري فبراير 2012 .
و لكن نتمناو من جديد أن السياسة الجديدة ديالهم ما تنسيهومش الأخلاق اللي معهود عليهم و الكلمة اللي كانوا عطاو فإطار التحالفات القبلية ديال المجلس و اللي هما طرف فيه منذ إنتخابات 2003 ، و كما كيقولو الرجل هو الكلمة .
من خلال الأصداء ديال الإجتماعات، كيتضح أن حزب العدالة و التنمية فالدورة، غادي يدير العصا فالرويضة، و هذا اللي خلانا كنتسألوا، علاش فهاذ الوقت بالذات ؟ ربما من حيث الإنتخابات على مقربة من الوقت.
نعم من حق ديالكم ديرو السياسة، و لكن فين غادي تمشي ذيك الوعود مع الأغلبية اللي أنتم جزء من سياستها و شريك فجميع القرارات ديالها سواء صوتوا أو لا.
و أظن انكم غادي ديرو خير إلا كتفيتوا غير بمقولة الدين نصيحة، و كذا وسخنا نشروه بينتنا، و طبقوا مقولة ، أنصر أخاك ظالما او مظلوما.
ثانيا ، اللي يمكن نسجلوه على العدالة و التنمية هاذ اليام هو التحرك ديال واحد المستشار اللي منين بان و تشاع أنه غادي يتزعم لائحة الحزب الجماعية و ربما يصبح رئيس المجلس الجاي، عاد بانتلوا الجماعة. فين كان شحال هاذي؟
خصوصا أننا سجلنا الغياب ديالوا على شحال من دورة و إجتماع ؟ دابا عاد جاتوا يدير السياسة و المعارضة، و بالوا المجلس البلدي حذاه .
فين هو الموقف ديالك فالمجلس الإقليمي، زعما من حيث الناس مامتبعاش خبارو، إلا معول تقوقل اللهم هذا منكر، قولها أسيدي حتى فالدورة الأخيرة ديال المجلس الإقليمي، و قولها غير لذيك السيد اللي كيتبلج فالطوموبيل - إم روج - وهو ما محقوش يستغلها لإنه ما عندو حتا مسؤولية فالمجلس، أو خايف من القرب ديال سيد العامل و تخسر بلاصت البريستيج .
فالأخير ، بغينا نقولوا للعدالة و التنمية، راه الشارع العام فتازة ما ناقصوش اللي يزيد يعمرو باركا غير الناس اللي كما قالوا الزعماء ديالكم كيعمروه ما تزيدوهش حتى نتوما، فإلا كان السيد النائب جمال المسعودي كيقلب يخرج تازة من حالة الإحتقان ، فكنقولوا لو هاذا هو الوقت اللي خاص تحكموا فيه العقل ديالكم ، و تكونوا أنمتا الكبار اللي نقتاديو بيكم .
