كيكتبها: بنعبد الله المغربي دابا داخلنا عليكم بالله، وبالنبي رسول الله، هادو اللي جايبين معتز مطر يدافع على المغرب واش عندهم شي عقل؟ ولا صافي رسميا طار ليهم الفريخ وولاو غير يشيرو فكاع الاتجاهات؟ شي جمعية، ولاشي نادي، ولا شي ائتلاف،ولا شي موقع ولامانعرف شنو قال ليك غادي يستاضف هاد الراجل مسكين باش يدافع على المغرب فوجه العبارة المبتذلة اللي كيستعملوها الخوانجية فالعالم العربي كلو : الذباب الإلكتروني !!! المغرب كان ديما عاطي لراسو التيقار تجاه هاد التفاهات، وماعمرو استورد النقاشات الغبية اللي كيعج بها الشرق المريض مسكين. لذلك بحال هاد النزق الخاوي اللي كيديروه شي وحدين فينا ماعندو حتى معنى، ودليل غباء أكثر منو دليل شي حاجة أخرى. معتز مطر؟ أواااه؟ ماشي حشومة وماشي خايبة حتى فالتعاويد آسميتكم؟ خليونا من هاد التفاهة، وآجيو نهضرو بالمغربية تاعرابت على بعض التراشق اللي داير بين مواطنين خليجيين وبين مواطنين مغاربة. شي وحدين من عندنا كعاو وغضبو وطلع ليهم الدم علاش واحد الصحافي سعودي -والله حتي واحد ماعارف سميتو - هضر على المغرب بشكل خايب. وهاهو كاع هضر علينا بشكل خايب؟ ومن بعد؟ آش طرا كاع فملك الله؟ والو... عشرات الصحافيين المغاربة كيقيلو يهضرو بشكل خايب على السعودية، وعشرات الصحافيين المغاربة كيقيلو يعايرو الإمارات وشكلاط العمارات، وهاد المسألة ماعندها حتى علاقة بالدول وترتيبات السياسة ديالهم أكثر من هذا كاينة واحد الكلمة سيئة للغاية كيستعملها جزء كبير من شعبنا باش يوصف شعب آخر هي كلمة « الحوالا ». هادي بوحدها واش ماشي فضيحة وماشي عنصرية وماشي سب مقيت وماعندو حتى معنى؟ طبعا، هي كلمة طايحة وغير مؤدبة. غير هو الجمل ماكيشوفش حدبتو، ولكن كيشوف حدبة خوه، ومنين كتنوض هاد النقاشات التافهة بحال هاكا، تافهين من النوع الصغير بحال معتز مطر هوما اللي كيستافدو منها، وهوما اللي كينتعشو وكيعجبهم الحال... هاد معتز هو اللي ديك النهار قال لينا ولد القرية (ماعارفش حتي يقول ولد الكرية بشكل مقاد) هو صوت الشعب المغربي من الآن فصاعدا، وهو الفنان اللي كيهز لينا الضرابو، وهو مارسيل خليفة العصر الحديث والشيخ إمام ديال الأوقات الحالية !!!! وفالأخير ناس من عندنا يطلبو عندو اللجوء الكلامي باش يعاير فبلاصتهم الإمارات والسعودية ومصر حيت هو خدام مع تركيا وقطر، وحيت هوما ماكيعرفوش يهضرو بحالو.... حشومة وحنا هاد الشي ماكندريوهش. حنا خاليين هاد الغباء للشرق راه غارق فيه، لذلك ارتقوا الله يرحم ليكم الوالدين شوية وهنيونا الله يعطيكم النجاح. معتز مطر آلدراري؟ ياشماتة أبلة زازا فينا كاملين. شوهتونا عاوتاني الله يسمح ليكم وصافي...
