حميد الحضري لأخبارنا: بزاف ديال السياسيين ركبو على الموجة وبغينا نقولو ليهم بأغنية "البارود" باراكا

أصدر الفنان المغربي المتألق "حميد الحضري" بداية الأسبوع الجاري، أغنية جديدة حملت اسم: "البارود"، والتي صورها وابدع فيها بتقنية "الفيديو كليب" بمشاركة الفنان "ميميح". عمل أثار جدلا واسعا، كون كلمات الأغنية حملت رسائل قوية جدا... خصوصا وأنها خرجت للوجود في زمن انتخابات...
أخبارنا المغربية تواصلت مع الفنان حميد الحضري وكان لها معه الحوار التالي..
أخبارنا: سؤالنا الأول علاش "طرطق البارود الآن؟ ولماذا التوجه لهذا المنتوج الفني لي جمع بين ما هو فني وتراثي أصيل وأيضا بين الطابع العصري ليك سي حميد وللفنان ميميح؟
الفنان حميد الحضري: أغنية البارود جات من فكرة عيطة جبلية "طرطاق البارود فالعقبة د غزاوة" اللي كانت تغنات تكريمًا للشهداء اللي ماتو في احد المعارك ضد المستعمر، جدودنا اللي ضحاو بحياتهم باش احنا يكون عندنا وطن جميل و لكن بزاف ديال السياسيين ركبو على الموجة و نساو الوصية و خدمو غير مصالحهم على حساب مصالح الشعب، احنا بهاد الاغنية بغينا نقولولهم باراكا، و المغرب محتاج ناس باغية تخدم البلاد من قلبها، و باغية مصلحة الشعب قبل كلشي، و في الكليب مع المخرج "عبد المجيد العمراني" حاولنا نسلطو الضوء على جمالية منطقة اقليم شفشاون و خدمنا على قصة المغزى ديالها هي رسالة من عند الاطفال اللي هم جيل المستقبل الى كل المسؤولين باش يركزو اكثر على مصالح الشعب و خصوصًا "التعليم" اللي هو أساس كل ازدهار "العلم نور"... و في الموسيقى بتوزيع "أنازارت" حاولنا نخدمو على الموسيقى الجبلية في حلة جديدة باش توصل للشباب.
أخبارنا: كيفاش لقيتي التعاون مع الفنان ميميح والفكرة تالأغنية وتالكليب واش نتاعك أو نتاعو ام لجهة ثالثة؟
الفنان حميد الحضري: كانت تجربة رائعة مع مميح و تفاهم كبير منذ البداية، و كنشكرو على انه قبل يغني على هاد الموضوع رغم الخطورة ديالو لان كاين شي ناس اللي ماقدروش يديرو هاد الخطوة، انا كان علي شويا ديال الضغط لانني بدلت الستايل اللي مولف كنغني بيه...
أخبارنا: سؤال اخير سي حميد، الكلمات تالأغنية قوية جدا (اللي خانو، بلادي، مواطن صالح، الموت، الغنيمة، الخائن، نفيقو، ضحية، الكاذب، واكل حقه، الخيانة، باعوني، الظالم، المظلوم..) الا ربطناها بالظرفية الحالية وهي ظرفية انتخابات كاين لي فهم منها انها كتحمل رسائل بهذا الصدد... رأيكم سي حميد؟
الفنان حميد الحضري: هي رسالة موجهة لكل الناس اللي باغيين او اللي خداو مناصب و ما عملو بيها والو، فكرو غير فمصالحهم و هادي كتعتبر خيانة للوطن، و هاد الظرفية هي ديال تقديم الترشيحات ديال الانتخابات و مازال كنشوفو نفس الوجوه اللي باغا تركب على الموجة، كلشي عارف كيفاش كيديرو باش يطلعو و اشنو كيديرو ملي كيطلعو... وعلى العموم كنحاول نستمر في الاشتغال على مشاريع قادمة ان شاء الله و خصوصا محاولة زيارة التراث المغربي الغني بالايقاعات و الانماط الموسيقية...