زجل.. الطاحونة

هاذ الأرض طاحونة
فيها لاحونا
حتى احلامنا سمّموها،
حتى كلامنا تلّفو معناه
كان الحق خويا
وكنت انا حداه
الحگرة فزنقة مسدودة
واليدين ليها ممدودة
الظالم هارب
والناس تابعاه
طحنوا عمرنا
وتصوّروا معاه
قتلوا صبرنا
تزاحموا فعزاه
حرقوا ايامنا
مضّاواْ اسكاتنا، وبيه دبحونا
هادا لبلاد طاحونة
فيها لاحونا
هاذ البلاد طحنت القريب والبعيد
بغات تمسخ الاحرار عبيد
ما شبعاتش...
تحرق وتزيد
واللي ما طاب طْري
يطيب قدّيد
بلادنا بالحگرة مسكونة
بلاد الطاحونة
فيها لاحونا
طفاوا النور فعينينا
من ضو الشمس حرمونا
بالجوع
حزمونا
بلاد مجنونة، تاكل اولادها
تطحنهم
بالنار
والحديد