20 فبراير علاش خايفين؟؟

ستيلو/ رمسيس بولعيون
ramsisse@blafran.com
ملي بانت حركة 20 فبراير في الفايس بوك ودعت للخروج للشارع، و المغاربة خايفين، لحد الساعة ما فهمتش مناش خايفين، نحن بلد كا دار فيه شهريا 10 الوقفات الإحتجاجية، المطالبة بتعديلات و بتحسين الوضعية الإجتماعية و الإقتصادية. ما يعني أن الأمر عادي جدا و مكايخلعش، بالعكس كاع لمغاربة خاص يساندوهم و يقولوا أه مزال خاصنا تعديلات في البلاد باش كلشي إكون مزيان.
كاين اللي كا يقول أن هاد الخرجة سيستغلها أعداء الوحدة الوطنية، و غا يقلبوها لفوضى، لخدمت مصالح الإنفصاليين، أنا كانقول أن المغاربة الأحرار ليسوا أغبياء لتستغل خرجاتهم المطالبة بالعدالة الإجتماعية و التعديلات الدستورية و السياسة، من لبراهش ديال البوليزاريو، و الناس اللي غا يخرجوا في 20 فبراير، إلى مشاو حتى سمعوا شعارات ضد الوحدة الوطنية هم أول من غا يتدخل لوقفها، حيت المطالب اللي رافعنها ما غيرفعهاش غير واحد باغي الخير للمغرب و لشعبوا، و الكل عارف بأن الوضعية في المغرب مكرفصة و ماشي تا لهيه، بركا غير نقولو أن عائلة الفاسي الوزير الأول، عندهم أكثر من 15 منصب ووظائف كبيرة في البلاد، هذا واحده كافي للخروج للشارع، و نقولو باركا من إستغلال النفوذ و السلطة.بلا ما نهدروا على الهمة و حزب اللي إغتصب السياسة المغربية و داير ما بغا، و ما الغريب في مطالبة بتعديل الدستور و فصل السلطة إلى كانت أحزاب سياسية تعترف الدولة بها، كطالب بنفس الشيء و كاع عطات مقترحات ديال التعديلات الدستورية؟؟
و الغريب في الأمر و اللي فعلا ما خصش نطيحوا فيه، هو الدخول في الحريات الشخصية ديال الناس، حيث بعض الأطراف بانت على الخط، و عوض تناقش بعقلانية و في الفكر ديال الحركة و المطالب ديالها، مشات تا تنشر صور شخصية للناس ديال الحركة، و كا تمسهم في المعتقدات و الأفكار ديالهم الشخصية، و الإتهام بالإلحاد و الكفر و المسيحية، ياك كل واحد تيتعلق من كراعوا و تا حد ماشي شغلو في الأخر، وراه شفتوا كيفاش المصريين أقباط و مسلمين و علمانيين و إخوان و حركات من كل الأطياف كانو يد في يد من أجل التغيير، و نساو كل ما هو شخصي و دربوا في المعقول.
لحد الساعة مطالب الحركة ما فيها لا إسقاط نظام لا ثورة مسلحة لا إعطاء الحق للبوليساريو لا والو، فيها مطالب عادلة و مشروعة للإصلاح، و حتى الحكومة اللي معنية بالأمر و على لسان الوزير الناطق بسميتها رحبت بالبادرة و قالت أنها تتعامل مع هاد الدعوات باطمئنان.
يعني ما كاينش علاش إخاف بنادم، و كلنا مغاربة و مغا نرداوش تستغل أي خرجة ديال الشباب المغربي، من شي حد كما كان نوعه و خصوصا خصوم الوحدة الترابية. حتى أنا مغربي باغي مغرب بلا حكرة باغي مغرب بلا برارك باغي مغرب في الخدمة باغي مغرب فيه الصبيطارات كيداواو فيها ولاد الشعب بلا محسوبية، باغي مغرب إعيش فيه حتى المسكين باغي مغرب فيه حرية التعبير بلا قمع و لا زرواطة باغي مغرب زوين من طنجة حتى لكويرة.