وحريرة هادي مع هاد الحرارة للي غاديا وكترتافع فشهر غشت كلشي سخن,,وأراك يا بحورات ولا بيسينات وحتى الضايات والكلاتي ,,,وكاين للي سخن عليه راسو مع اقتراب شهر رمضان وتخلط عليه الشغل وبدا يسول راسو ويسول الناس: واش يصوم ولا يعوم ؟؟ أما شي وحدين عاد كيجيهوم مرض القلب والكبدة والمصارن وكاين للي عاد كيطلع ليه الطانسيون ,,أو كيفيض عليه السكر ولا الملحة وكايولي يخاف على المعدة ,,وكاين للي زعما كتجيه السخفة مسكين وما يمكنش ليه يصوم ..وهادشي كلو من سعد عيادات الأطباء للي كيضربو يديهوم فهاد المناسبة ,,مناسبة الفرار من صوم رمضان .,وهاد وكالين رمضان كيقلبو على مبررات باش يقصيوا ولا حيلة مع الله .,,,أما هادوك للي خرجو ليها كود بلا مرض ولا يحزنون ..قالك أسيدي داكشي داخل فالحرية الشخصية ...وحقوق الإنسان للي تبهدلات مللي للي مالقا ما يدير يقلبها جمعية ولا منظمة ولا أي حاجة فيها الهضرة على الحقوق بلا إنسان ,,,وكاين منهوم للي كيدافع على وكالين رمضان بالعلالي وعلى عينك أبن عدي ,,,وكاين للي كياكل حوايج أخرى ومن تحت الدف ؟؟؟؟؟ أنا حقوق الأسنان في المضغ فلا أحد يدافع عنها .وهذا موضوع آخر.وعلى غرار كيف كيف الله يحفظ هاد وكالين رمضان كيوجدو روسهوم للسريط والماكلة فالنهار الكهار,,تحت شعار كول كول ولا واكل واكل .المهم كل واحد كيدير للي بغا باسم الحرية الشخصية وديك الحقوق للي قلنا قبايلا..وما بقات لا قيم ولا احترام ولا تقدير للمجتمع ,,,وحريرة هادي ......نسيت...كاين شي وحدين كيضرك وجهو كا3 وكيهرب للخارج باش ما يشم لا حريرة ما يسمع آذان ,,,والله يدينا فالضو ,,قولوا أمين,,شحال من واحد كيسول هاد ليامات : نصومو ولا نعومو؟؟وفالحقيقة كل واحد يدير للي بغا ..يصوم ولا يعوم ولا يديرهوم بجوج ولا يصوم بالنهار ويعوم بالليل ,,,أنا بعدا وبحالي بززززااااف ما كاين عومان مع الصيام ,,ودوك للي غادي يصومو ويعومو ما نعرف كي غادي يديرو مع الشوفان والتبركيك فاللحم الأبيض المتوسط والآخر المعروض على سواحل المحيط الأطلسي؟؟وخاصة هدوك للي كيصرحوا بالممتلكات ديالهوم على شط بحر الهوى ,,,رمضان على الأبواب وللي بغا يصوم يصوم وللي بغا يعوم يعوم وللي بغا يفطر يفطر ولكن بلا فضيحة ,,أما شي حاجة أسمها الحكومة فهي صايمة على طول ,,صايمة علينا حتى ولينا غاديين بوحدنا ,,بحال يلا ما عندنا حكومة وزيد عليها ديك البرلمان للي ضاربها بنعسة وتمخميخة هادا شحال ...أهيا غير خليوا الباكور ناعس ..راه يلا فاق غادي يوافق على شي زيادات فالأسعار..ماشي فالأجور ..
