بوغطاط المغربي: شكرا محمد زيان.. لقد كان كان فعلا حوارا لكشف المستور

تحية بوغطاطية للجميع،
أنا اليوم وعلى غير العادة، قررت نخصص هاد المقال البوغطاطي باش نشكر وبكل صدق محمد زيان على الظهور ديالو الأخير على قناة المدعوة دنيا فيلالي الهاربة إلى فرنسا لي حتى هي كنشكرها من هاد المنبر.
كنشكرها لأنها ولأول مرة كتجيبها لاصقة فالعناوين المرقاوية لي كتختار للفيديوهات ديالها... من مور ما خلات حوار قنبلة، حوار نووي، حوار ممنوع... هاد المرة ختارت تسميه "حوار كشف المستور"، وكان فعلا حوارا لكشف المستور وبدون أي مكياج.
لذلك، شكرا محمد زيان وشكرا دنيا فيلالي على كشفكما للمستور... شكرا حيت زدتو بنتو على حقيقتكم وفضحتو راسكم براسكم.
شكرا زيان، حيت اليوم بينتي للجميع أن قناة دنيا فيلالي هي فعلا بمثابة واد الحار ديال أشباه المناضلين والمعارضين. فينما كاين شي حد عندو شي طون أو طون ونص ديال الوسخ والسوابق، كيجي يفرغو عندها فالقناة.
شكرا، حيت بينتي وجهك الحقيقي... وكشفتي فعلا المستور ديال نفاقك والخبث ديالك بخصوص دعمك للمؤسسة الملكية، بينما الحقيقة هي عكس ذلك تماما. خصوصا وأنك تصر دائما على اختيار نفس القناة لي مسخرة راسها باش تهاجم نفس المؤسسة لي كتدعي أنك معاها نتا. الحقيقية أن كل واحد فيكم كيحاول يصفي حساباتو عن طريق الآخر... بمعنى آخر، طاح الحك وصاب غطاه.
شكرا حيت كشفتي المستور ديال متاجرتك بقضية الضابطة المعزولة وهيبة خرشيش، لي إلى حدود الساعة مازال ما بغات تصرط ليك لا نتا ولا غيرك بأن داك الملف تحل وتسالا بمحض إرادتها وبخط يدها، وخرج ليكم من يديكم.
شكرا حيت عطيتي فرصة باش الرأي العام يفهم بلي من مور ما عييتي طلع ونتزل باش تلعبو بوهيبة كيف بغيتو، فاللخر دارت ليكم الصابونة، كيف دارها ليك ناصر الزفزافي وغيرو من مور ما عرفو بلي غير كتغرق ليهم الشقف وكتصفيو بهم حساباتكم الشخصية.
شكرا على هفواتك وخرقك لسرية المحادثات التي دارت بينك وبين وهيبة، لي زدتي بينتي بها بأنك لست رجل قانون وبأنك أول واحد كيفرشخ الخصوصية والحياة الخاصة ديال الناس وبأنك فعلا وكما يقال عنك، المحامي المختص في تغراق الشقف للموكلين ديالو بحال لي درتي مع بوعشرين وغيرو.
شكرا على إصرارك على مواصلة الكذب والبهتان بخصوص القضايا التي توبعت من أجلها، سواء ديال التحرش أو ديال الاختلاس أو ديال جرائم أخرى، حيت كتعطي مزيد من الفرص لإعادة نشر تلك الحقائق وكتساهم نذكرو لقريب قبل البعيد، أشنو كتسوا.
شكرا حيت كشفتي المستور لي كان كيدور بينك وبين عملاء الأبواق الجزائرية لي نهار وماطال كينشرو الإشاعات حول ملك البلاد، ولي جيتي بكل وقاحة عند دنيا تثمنها وتساهم في إعادة ترويجها، كيفما دنيا براسها خدامة نهار وما طال كتنشر فيها، فنفس الوقت لي كانت فيه على تواصل دائم ولازالت، مع العميل المخابراتي الجزائري سعيد بنسديرة، كيفما كنتي على تواصل معاه حتى نتا، وحاول يدخل فملف وهيبة كذلك، باعتراف منه فواحد الفيديو فقناتو على اليوتوب.
شكرا على خرجاتك بديك الطريقة البهلوانية سواء مع دنيا أو غيرها، لي كتزيد تأكد بها ما يقال عنك بشأن حالتك النفسية وأنك في أرذل العمر، وبلي راك وليتي غير كتخرف.
شكرا حيت ما وقرتيش لا الأحياء ولا الأموات من ضحايا الاعتداءات الجنسية، وبينتي فعلا أنك ناهش لأعراض الناس وشرفهم، في تناقض تام مع ما تدعيه من محاربتك لانتهاك الحياة الشخصية.
شكرا زيان على كل أخطائك وهفواتك ونفاقك... شكرا حيت ساهمتي بزاف في كشف الفساد... ولكن الفساد ديال أشباه المعارضين لي كنتي باغي تحظى حتى أنت بشرف تلك التسمية... ولكن مع الأسف تاريخك الأسود وماضيك القذر لا يسمح... وإذا سمح لشي حاجة، راه فقط غادي يسمح باش يزيد النيران ديالو تحرق من يدعي الطهرانية والنقاء والشرف من أشباه المناضلين كلما حاولتي تتقرب منهم باش تاكل التومة بفمهم.
شكرا لك على كل هذه الخدمات المجانية... شكر خالص وتحية حارة لك من عند بوغطاط المغربي... واصل عملك هههههه.