بوغطاط المغربي | "كلهم مطبعون" (الحلقة 2).. زكرياء مومني كان منخرطا في نادي إسرائيلي مختص في تلقين أساليب قتال عصابات الهاجاناه الصهيونية

الخط :
تحية بوغطاطية للجميع،
وفاءً بوعدي لكم بأنني غادي نكشف ليكم حقيقة عدد من الأشخاص ممن يدعون في الظاهر مناهضتهم للتطبيع، بينما في السر يفعلون العكس... اليوم كنطل عليكم قرائي الأعزاء في حلقة ثانية من سلسلة "كلهم مطبعون"، وضيف الحلقة ديال اليوم هو زكرياء مومني، بعدما كشفت ليكم فالحقلة الأولى العلاقة ديال الجمعية المغربية لحقوق الإنسان ورئيسها عزيز غالي بمنظمات سياسية داعمة لإسرائيل وكتدافع على الأمن ديالها، بل وكتوصف الفلسطينيين بالإرهاب.
زكرياء مومني لي التاريخ والسجل ديال الفضائح ديالو تبارك الله عاااامر وثقيل... أش منك يا ابتزاز وأش منك يا نصب وعنف واعتداء... ومؤخرا تزادت ليهم ميولاته الجنسية الشاذة وانخراطه في مجتمع الميم فكندا، ولي كنت كشفت التفاصيل ديال هاد الموضوع فعدد من المقالات على موقع برلمان.كوم... اليوم غادي نكتاشفو حقيقة أخرى أو فضيحة أخرى وبأدلة موثقة.
طبعا كما هو مبين فالصورة ديال المقال، كنشوفو زكرياء مومني فنادي رياضي سميتو "مكابي باريس" (Maccabi Paris) وهو نادي رياضي إسرائيلي كاين فالعاصمة الفرنسية باريس. نادي رياضي معروف تابع ل"اتحاد مكابي العالمي" وهو منظمة إسرائيلية رياضية عالمية، المقر ديالها فإسرائيل فواحد المنطقة سميتها "رمات غان" فتل أبيب.
الصورة مقتطفة من واحد الاستجواب كان دارو معاه واحد الموقع فرنسي في فرنسا سميتو «Là-bas si j'y suis» فأكتوبر 2015. الاستجواب تصور مع زكرياء مومني فنادي "مكابي باريس" لي كان منخرط فيه وكيتدرب فيه.
كاين لي غادي يقولي إيوا وشنو فيها ؟؟ ومنبعد؟؟ ها هو كاع كيتدرب فنادي إسرائيلي، فين المشكل؟؟
لا أسيدي ما كاين حتى مشكل وما عمري قلت بلي كاين مشكل فهادشي... أنا هنا فقط لكشف النفاق والازدواجية، خصوصا وأن زكرياء مومني ومن كان يدور هو في فلكهم من أشباه المعارضين من النصابة والمبتزين والإرهابيين، كانوا صباح مساء منوضين القيامة على ما يسمى ب "التطبيع" وكانو كيطالبو بقطع العلاقات مع إسرائيل بدعوى دفاعهم عن القضية الفلسطينية... وأن حكا راه "التطبيع" خيانة لفلسطين وللشعب الفلسطيني.
واخا أسيدي ما قلتي عيب.... ولكن كيفاش واحد بحال زكرياء مومني عاطي لراسو الحق يتبورض بهاد الشكل فهاد القضية ديال "التطبيع" وهو براسو وياااا سبحااااان الله، مشا اختار نادي إسرائيلي من دون كاااااع النوادي الرياضية باش يتدرب فيه في باريس ؟؟؟ على قلة النوادي تما ؟؟؟
المثير هو أن هاد النادي ماشي مجرد نادي رياضي إسرائيلي عادي والسلام.
لاااا... وإنما نادي متخصص فواحد النوع ديال فن القتال سميتو KRAV MAGA لي كان المؤسس ديالو هو الإسرائيلي "إيمي ليشتنفلد" Imi Lichtenfeld فالثلاثينيات من القرن الماضي، ولي كان عايش فتشيكوسلوفاكيا.
أثناء الحرب العالمية الثانية، هاد "إيمي ليشتنفيلد" جمع واحد المجموعة من الرياضيين الشباب لي كانت مهمتهم حماية المجتمع اليهودي المحلي فأوروبا. ومنبعد ف 1942 مشا لفلسطين فاش كانت تحت الانتداب البريطاني، ودوز واحد الوقت مع القوات البريطانية، من بعد انضم إلى عصابات الهاجاناه الصهيونية، وهي تنظيم شبه عسكري تحول منبعد للجيش الإسرائيلي، وهو لي كان كيدرب العناصر ديالها.
ولكن بعد سنوات، غادي يتم تطوير هاد الفن القتالي كنظام عسكري للدفاع عن النفس والقتال من طرف الجيش الإسرائيلي والأجهزة الأمنية الإسرائيلية، كيفما هو مكتوب فالوصف ديال هاد النادي ديال Maccabi Paris لي كان زكرياء مومني منخرط فيه.
الأكثر من هادشي، هو أن هاد النادي الرياضي الإسرائيلي معتمد فالشركاء الأساسيين ديالو، مدرسة Emeth Krav Maga القائمة على ما يسمى ب "النظام الإسرائيلي الفعال لمغا كراف" OPERATIVE ISRAELI SYSTEM))
وهو واحد النظام ديال فن القتال ديال Krav Maga تأسس بناء على طلب من الحكومة الإسرائيلية فالثمانينيات من القرن الماضي، وكلفات مسؤول فجهاز "الشين بيت" Shin Bet وهي المخابرات الداخلية الإسرائيلية، سميتو Gabriel SHAI قبل ما يزيد يطورو التلميذ ديالو لي سميتو AARON ELBAZE باش خلق الشعبة لي ذركتها ديال OPERATIVE ISRAELI SYSTEM
وهو صاحب المدرسة ديال Emeth Krav Maga الشريكة الرئيسية ديال نادي Maccabi Paris لي كان منخرط فيه زكرياء مومني.
وهاد السيد لي سميتو AARON ELBAZE كينشط كذلك فبيع منتجات محددة ونوعية خاصة للأجهزة الأمنية على أعلى مستوى.
أكيد أن أي واحد غادي يطلع على هاد المقال وهاد المعطيات غادي يجيه هادشي خطير بزاف، وكاين كذلك لي غادي يقول: واااا هادشي مبالغ فيه بزاف وبلي ما كيعني وااالو وبلي غير بغيت نضخم الموضوع على زكرياء مومني... وبلي أاااصلا مومني الرياضة ديالو هي اللايت كونتاكت، أشنو العلاقة ديال Krav Maga مع اللايت كونتاكت أو الكيك بوكسينغ ؟؟
طبعا من حق أي واحد يتفاعل مع هادشي بالطريقة لي بغا... ولكن...
ولكن السؤال الحقيقي لي خاصو يتطرح هو إذا كان زكرياء مومني كيمارس رياضة الكيك بوكسينغ كيف كيدعي، علاش اختار بالضبط نادي متخصص ومعروف بالدرجة الأولى بتلقين فن قتالي خاص بالجيش الإسرائيلي، وتاريخيا كان ديال عصابات الهاجاناه الصهيونية؟؟؟
علاش زكرياء مومني اختار نادي إسرائيلي من دون كااااع النوادي لي كاينين فباريس ولي مختصين بالدرجة الأولى فاللايت كونتاكت والكيك بوكسينغ وماشي ف Krav Maga ؟؟؟
زكرياء مومني سمح فكااااع النوادي ديال الكيك بوكسينغ فباريس لي "فرنسيين-فرنسيين" 100%، واختار نادي إسرائيلي من دون كاااع النوادي، غير هاكاك زعما بالصدفة ؟؟؟ ونادي ديال فن قتال صهيوني من الفوق؟؟؟ واش غير صدفة ولا كانت عندو شي توجهات معينة ؟؟؟
كولشي ممكن... ولكن فآخر المطاف، هادشي إذا كان كيثبت شي حاجة، فهو كيثبت أن زكرياء مومني مطبع قديم مع إسرائيل وبلي من خلال الاشتراك ديال الانخراط، غادي يكون ساهم فالمالية (ولو بالقليل) ديال هاد النادي الإسرائيلي لي كيلقن شعبة ديال القتال خاصة بالجيش الإسرائيلي وكيساهم فتكوين الشباب لي ممكن يلتاحقو من بعد إما بوحدات خاصة فجيش إسرائيل أو إحدى الأجهزة الأمنية ديالها...
وهادي ماشي علاقة جارية حاليا زعما باش يقدر ينوض يقطعها، وإنما شي حاجة لي غتبقى وصمة فحياتو ما عندو كيف يدير يحيدها إلى الأبد....
وإلى حلقة أخرى من سلسلة "كلهم مطبعون" ومع مطبع آخر في السر.
الوسوم
المغرب بوغطاط المغربي زكرياء المومني فرنسا