مسرحية سِيدْنَا قْدَرْ (الحلقة 5)

الفصل الأول
ذِيكْ اللِّيلَه...
كُرَّيْطْ: (يعبر عن حيرته.) وَآشْ الْمَعْمُولْ؟
زْعَيْطْ: (يرد على كُرَّيْطْ بِتَرَوٍّ.) الْمَعْمُولْ، مَا نْدِيرُ حْتَى وَاحْدَه وَنْسَمّْطُ عْلِينَا الآفَاتْ.
كُرَّيْطْ: (يرد على زْعَيْطْ بارتياح.) هِيَّ هَذِكْ. نَتْسَنَّاوْهْ نِيتْ. نْشُوفُوهْ آشْ غَادِي يْگُولْ لِنَا.
زْعَيْطْ: (يسأل كُرَّيْطْ باستغراب.) آ شْكُونْ آوَ؟!
كُرَّيْطْ: (يَهْمِسُ لزْعَيْطْ.) صَيّْدُونَا قْدَرْ!
زْعَيْطْ: (يطأطئ رأسه إذعانا لكلام كُرَّيْطْ.) وَا اِيَّيَّيَّيَّيَّهْ، اِيَّهْ! كَايْنَه، كَايْنَه!
كُرَّيْطْ: (يعلل اختياره بمهارة.) نْعَرْفُ رُوسْنَا مَنْ رَجْلِينَا وْعَادْ نْشُوفُ.
زْعَيْطْ: (ينتقل من حالة الارتياح إلى حالة القلق.) وْوَخّى وَخّى، ارَى رَاسِي تْگُوجَجْ عْلِيَّ. وَاحَدْ الْخَاطَرْ كَيْگُولْ لِيَّ غِيرْ نْنُوضُ نْشَرْبُ الَحْدِيدْ مَا حَدُّه رَايْبْ.
كُرَّيْطْ: (يستدرج زْعَيْطْ لرأيه بدهاء.) وْوَخّى وَخّى، أنَا يَا مَا كْرَهْتْ شَيْ نَعْرَفْ آشْ غَادِي يْگُولْ لِكْ وْلِيَّ. مَا خَاسْرِينْ عْلِيهَا وَلُو!
زْعَيْطْ: (يسأل كُرَّيطْ بارتياب.) وَآشْ طْلَبْنَا منُّه، بَعْدَ؟
كُرَّيْطْ: (يستغرب من سؤال زْعَيْطْ.) مَا كُنْتِ شِي حَاضَرْ نَاظَرْ؟!
زْعَيْطْ: (يرد على كُرَّيْطْ بضجر.) مَا رَدَّيْتْ شَيْ الْبَالْ، وَكَّانْ.
كُرَّيْطْ: (يجيب على سؤال زْعَيْطْ بثبات.) طْلَبْنَا مَنُّه، آ سِيدِي عْلِيكْ... (يتردد.) طْلَبْنَا مَنُّه... (يرتبك في الإجابة.) آشْ نْگُولْ لِكْ؟ شِي حَاجَه بايْنَه وْبَعْقَلْهَا، ماَ طْلَبْنَا شَيْ.
زْعَيْطْ: (يستهزئ من كُرَّيْطْ.) هِيَّ اَدَرْنَا طَلْبَه مْلاوْطَه!
كُرَّيْطْ: (يرد على استهزاء زْعَيْطْ بسخرية.) اِلاَ گُلْتِ مْلاَوْطَه، مْلاَوْطَه.
زْعَيْطْ: (يحدق في كُرَّيْطْ ويسأله بغلظة.) وْبَاشْ جَاوَبْنَا؟!
كُرَّيْطْ: (يرد على زْعَيْطْ بفتور.) گَالْ لَكْ، آ سِيدِي، غَادِي يْشُوفْ.
زْعَيْطْ: (يحدق في كُرَّيْطْ ويسأله بغلظة.) گَالْ مَا يْگَدّْ شَيْ يْقَاوَلْنَا؟!
كُرَّيْطْ: (يرد على زْعَيْطْ بفتور.) گَالْ، آ سِيدِي، يْخَصُّه يْخَمَّمْ.
زْعَيْطْ: (يحدق في كُرَّيْطْ ويسأله بغلظة.) مَلِّي يَتْصَنَّتْ لَعْظَامُه؟!
كُرَّيْطْ: (يرد على زْعَيْطْ بفتور.) مَلِّي يْشَارْشِينَا فَى ضْوَاصَاهْ.
زْعَيْطْ: (يحدق في كُرَّيْطْ ويسأله بغلظة.) يَلْگَانَا فَى الْمِيرْدِينَاتُورْ؟!
كُرَّيْطْ: (يرد على زْعَيْطْ بفتور.) يْشَاوَرْ گَاعْ الْفَامِيلَه.
زْعَيْطْ: (يحدق في كُرَّيْطْ ويسأله بغلظة.) يْشَاوَرْ اَحْبَابُه وَاَصْحَابُه؟!
كُرَّيْطْ: (يرد على زْعَيْطْ بفتور.) يْشَاوَرْ گَاعْ الْخَدَّامَه.
زْعَيْطْ: (يحدق في كُرَّيْطْ ويسأله بغلظة.) يْشَاوَرْ گَاعْ الْمُعْرِفَه؟!
كُرَّيْطْ: (يرد على زْعَيْطْ بفتور.) يَتْشَاوَرْ مْعَ مُولْ الصَّنْكْ.
زْعَيْطْ: (يحدق في كُرَّيْطْ ويسأله بغلظة.) يَتْشَاوَرْ مْعَ اَبُو مْوَارَثْ؟!
كُرَّيْطْ: (يرد على زْعَيْطْ بفتور.) يَتْشَاوَرْ مْعَ اَبُو مْحَارَثْ.
زْعَيْطْ: (يحدق في كُرَّيْطْ ويسأله بغلظة.) يَتْشَاوَرْ مْعَ مُولْى الَكْلاَمْ؟!
كُرَّيْطْ: (يرد على زْعَيْطْ بفتور.) يَتْشَاوَرْ مْعَ السّْبَايْسِيَّه.
زْعَيْطْ: (يحدق في كُرَّيْطْ ويسأله بغلظة.) يْشَاوَرْ مُولْى الشّْوَارْ الْمَشْرَارْ؟!
كُرَّيْطْ: (يرد على زْعَيْطْ بفتور.) يْشَاوَرْ نَكِيرْ وْمُنْكَرْ.
زْعَيْطْ: (يحدق في كُرَّيْطْ ويسأله بغلظة.) يْشَاوَرْ هَاجُوجْ وْمَاجُوجْ؟!
كُرَّيْطْ: (يرد على زْعَيْطْ بفتور.) يْشَاوَرْ هَارُوتْ وْمَارُوتْ.
زْعَيْطْ: (يحدق في كُرَّيْطْ ويسأله بغلظة.) وْاِمْتَى يْرُدّْ عْلِينَا الَخْبَرْ؟!
كُرَّيْطْ: (يرد على زْعَيْطْ بفتور.) مَلِّي يْرُدّْ عْلِينَا الَخْبَرْ.
زْعَيْطْ: (يعلق على الأمر بما يفيد استحسانه لمجريات الأحداث.) وَا مَا گَالْ عَيْبْ.
كُرَّيْطْ: (يتمسك بما يعزز موقفه ويستدرج زْعَيْطْ بمهارة.) وَا يَاكْ بَعْدَ، مَا گَالْ تَى عَيْبْ؟
زْعَيْطْ: (يرد على كُرَّيْطْ بما يعزز موقف هذا الأخير.) تْعَايَنْ لِيَّ مَا گَالْ تَى عَيْبْ.
كُرَّيْطْ: (يستحسن الأمر ويعلق عليه بارتياح.) تَى اَنَا يَا گَلْتْ مَا گَالْ تَى عَيْبْ.
زْعَيْطْ وكُرَّيْطْ: (يستسلمان للراحة في صمت.)
زْعَيْطْ: (يكسر الصمت ويخاطب كُرَّيْطْ بأسى.) شْحَالْ مَنْ اَرْزَاقْ سَايْرَه تّْْفَرَّقْ! (يصمت لحظة ثم يتساءل بتذمر.) وَحْنَ؟!
كُرَّيْطْ: (يسأل زْعَيْطْ بفتور.) آشْ گُلْتِ؟
زْعَيْطْ: (يرد على كُرَّيْطْ بتذمر.) گُلْتْ لِكْ وَحْنَ.
كُرَّيْطْ: (يتضايق من زْعَيْطْ.) انْتَ آشْ گُلْتِ؟!
زْعَيْطْ: (يسأل كُرَّيْطْ بسُخط.) آشْ سَايْرِينْ نْگَجْدْرُ هْنَا يَا؟!
كُرَّيْطْ: (يستغرب من كلام زْعَيْطْ ويسأله بفتور.) نْگَجْدْرُ هْناَ يَا؟
زْعَيْطْ: (ينظر إلى كُرَّيْطْ شَزْراً ويخاطبه بحَنَق.) نْگَجْدْرُ هْناَ يَا! جَاوَبْنِي!
كُرَّيْطْ: (يجيب عن سؤال زْعَيْطْ بثبات.) كَنَتْسَنَّاوْ، نْشُوفُ گُرْعَتْنَا آشْ تْجِيبْ.
زْعَيْطْ: (يعلق على جواب كُرَّيْطْ باستخفاف.) اُمَّكْ آ اُمَّكْ عْلَى گُرْعَتْنَا!
كُرَّيْطْ: (يُستَفز فينفعل ويرد على زْعَيْطْ متحديا إياه.) إوَ مَا لَكْ، مَا اعَجْبَكْ حَالْ؟! احْلَى مَنْ الَعْسَلْ اسْرَقْ وَازْعَقْ وَاغْرَقْ وَتْوَضَّى لِكْ عْلَى رَاسَكْ!
زْعَيْطْ: (يرد على كُرَّيْطْ بدُعابة.) هَا حْنَ يَا نْدِيرُونِي «اسْرَقْ وَازْعَقْ وَاغْرَقْ» وَمْبَقْبَقْ گَاعْ وْهَارَبْ مَنْ الُوضُو لْتِيْمُومَه، زَعْمَا آ كُرَيْطَطْ، بْهَذِكْ گُرْعَتْنَا، هَذِكْ، عَنْدْنَا تَى حْنَ يَا فَى الدَّنْيَا شِي حَقّْ ثَابَتْ؟
كُرَّيْطْ: (يضحك، يتوقف عن الضحك بشكل مفاجئ ويخاطب زْعَيْطْ باكتئاب.) ضَحَّكْتِنِي، وَخَّى يْخَصّْْنِي غِيرْ نْفَرْنَسْ وْنَبْقَى مْقَرْنَصْ.
زْعَيْطْ: (يسأل كُرَّيْطْ بارتياب.) يَاكْ مَا زَعْمَا كَانْ عَنْدْنَا تَى حْنَ فَى الدَّنْيَا شِي حَقّْ ثَابَتْ وْضَيَّعْنَاهْ؟
كُرَّيْطْ: (يرد على سؤال زْعَيْطْ باكتئاب.) فَزَّقْنَاهْ، آ زْعَيْطْ، فَزَّقْنَاهْ.
زْعَيْطْ وكُرَّيْطْ: (يجمان في مكانهما. أَذْرُعُهُمَا ممتدة نحو الأسفل ورُكَبُهُمَا مطوية.)
زْعَيْطْ: (بعد صمت وجيز يخاطب كُرَّيْطْ بصوت خافت.) حْنَ يَا، دَابَا، مَا مْگَيّْدِينْ شَيْ فَى طْوَالْ وَاحَدْ؟
كُرَّيْطْ: (لا يَنْبِسُ ببنت شفة.)
زْعَيْطْ: (يلح على كُرَّيْطْ بصوت خافت.) يَاكْ؟
كُرَّيْطْ: (يرتاب. يرفع يده وينبه زْعَيْطْ.) اَسْمَعْ!
زْعَيْطْ وكُرَّيْطْ: (يُرْهِفُان السمع وهما ثابتان في وضع مثير للسخرية.)
زْعَيْطْ: (يرتاب. يَهْمِسُ لكُرَّيْطْ.) مَا سْمَعْتْ وَلُو.
كُرَّيْطْ: (يرتاب. يَهْمِسُ لزْعَيْطْ.) اگْطَعْ الْحَسّْ!
زْعَيْطْ وكُرَّيْطْ: (يُرْهِفُان السمع.)
زْعَيْطْ: (يفقد توازنه ويكاد يسقط فيتشبث بساعد كُرَّيْطْ.)
كُرَّيْطْ: (يفقد توازنه هو الآخر.)
زْعَيْطْ وكُرَّيْطْ: (يُرْهِفُان السمع ويحدقان في عيني بعضهما البعض.)
كُرَّيْطْ: (يَهْمِسُ لزْعَيْطْ بارتياح.) حْتَى اَنَا يَا مَا سْمَعْتْ وَلُو.
زْعَيْطْ وكُرَّيْطْ: (يتنفسان الصعداء، ينشرحان ويبتعدان عن بعضهما البعض.)
زْعَيْطْ: (يلوم كُرَّيْطْ.) طَيّرْتِهَا مَنّي خَلْعَه، آ الَمْلَوْغَمْ!
كُرَّيْطْ: (يعتذر لزْعَيْطْ.) ظَنّيتُه هُوَّ.
زْعَيْطْ: (يستغرب.) شْكُونْ هُوَّ؟!
كُرَّيْطْ: (يجيب بهمس.) صَيّْدُونَا قْدَرْ.
زْعَيْطْ: (يعلق على جواب كُرَّيْطْ باستخفاف.) غَ الرِّيحْ هَذَاكْ.
كُرَّيْطْ: (يخاطب زْعَيْطْ بارتياب.) آ وْدِي جَانِي بْحَالْ اِلاَ كَانْ يْعَيَّطْ.
زْعَيْطْ: (ينظر إلى كُرَّيْطْ شَزْراً ويسأله باستخفاف.) وَعْلَى مَنْ غَادِي يْعَيَّطْ؟
كُرَّيْطْ: (يرد على زْعَيْطْ بحزم.) عْلَى قَلَّتْهُمْ؟! اهْبَشْ مُوجُودْ! هَاكْ آ ابْنَ آدَمْ! هَاكْ آ هَرْوِي! هَاكْ آ عَفَارِيتْ السَّرْوِي! هَاكَ آ اَبُو كُبَّارْ الَمْفَرْوَحْ! هَاكْ آ ابُو فَالَجْ الطَّافَجْ! الْوَاحَدْ يَطْلُبْ غِيرْ الصَّحَّه وَالسَّلامَه!
زْعَيْطْ: (يصمت لحظة ثم يناجي نفسه بفتور.) مْشِينَا فْى حَالْنَا.
كُرَّيْطْ: (يستغرب.) فِينْ فْى حَالْنَا؟! (لحظةٌ ثم يواصل وفي صوته وحركاته ما يفيد رغبته في إقناع زْعَيْطْ بالعدول عن قراره.) نْگَدُّ نَتْقَضَّاوْ الْغَرَضْ وَنْدُوّْزُ نْهَارْ غْدَا مْضَايْفِينْ مْعَ رُوسْنَا فَى الظَّلّْ وَالْكَرْشْ شَبْعَانَه، مْطَرَطْگَه، وَمْشَبّْحِينْ فُوگْ شِي كَاتْرِي، احْسَنْ مَنْ غْلَلْ وَالْهَيْشَرْ فْى غُرْقْ شِي تُوفْرِي. (يسأله بنبرة إغراء.) نْصُبْرُ نْجَبْرُ. أوْ لاَ، لاَ؟
زْعَيْطْ: (يسأل كُرَّيْطْ بضجر.) وَنْصُبْرُ عْلِيهْ اللِّيلْ كَامَلْ؟
كُرَّيْطْ: (ينهر زْعَيْطْ.) اللِّيلْ دْخَلْ طُولُه فْى عُرْضُه وْبَاقِي تْسَمِّيهْ اللِّيلْ كَامَلْ؟!
(صمت.)