زجل: علاش اعليك لعداوة

هذا كيفان لكلام
دكو نقرة صافيا وديرو حلقة ف لوذان
أنا مغربي شريف، وكيف المايا وزان
ها راسي لفوق وما نفرط في اوطان قراي آ جارتي التاريخ، عاد البارح كنا اخوان
علاش عليك، بالضغينة
شوفي نيران لحسد كاديا ازمان
لسانك آجارتي طويل
وكذوبك طافحا ألوان
اسمع اسمع، يا الراوي
را الخاوا حدها الدنيا،
سديتي بابك، ولحبال الدم قطعتي وصال
را وهران تتنادي على وجدة، وطالبا سلام
علاش عليك لعداوة
عاد البارح كنا إخوان
احنا المغاربة واضحين وما فقلبنا ضغان
حاربنا لفرنسيس، كاع مجموعين
وما طوينا علام
جارتي آ جارتي، مال ثوابك جارا احزان
مال الجلابة المشروكة،
واش ناويا تقطعيها اكفان
الله يهديك يا الجارة
كي عبقادر كي الخطابي واش نسيتي زمان
ها عار الميمة المبروكة
وحليب لبزيزيلة المشروكة
رجعي لله، يا الخضرا
نربطو الجوجة ونحرثو بلادنا امطاير
تعود الصابا علينا، ونفرقوها ا ذخاير
ويلا كنتي غالطا، الحق حقي، وعليه ما ندور
رمالك حرة يا بلادي
والله لي مسك تنثور
افقدتي لجام اصوابك يا الجارا
هاني ف العيون كا نتييي
ولعشية رايح للسمارا
نوصيك يا الجارة ف دروب التاريخ ديري شي دويرة
را احنا مغاربة موحدين من طنجة لكويرة
وبرهانا ف كيفان لوزان
الله يهدن لوطان
وينصر السلطان.