بنعطية حرج الركراكي ونيتو وحتى الجامعة.. أش كيدير مع المنتخب فماتش الرأس الأخضر وهو وكيل اللاعبين ؟

وضع تواجد وكيل أعمال اللاعبين المهدي بنعطية وسط المنتخب الوطني المغربي فالماتش أميكال مع منتخب الرأس الأخضر، الناخب الوطني وليد الركراكي فوضع محرج.
وبعدما راجت صورة ديال وكيل أعمال اللاعبين المهدي بنعطية وهو مع وليد الركراكي ولاعبين المنتخب المغربي، تطرحات مجموعة من التساؤلات على شنو كان كيدير فليكيب ناسيونال وهو دابا كيخدم وكيل ديال اللاعبين، واش هذا الشي يقدر يؤثر على المحيط ديال المنتخب الوطني المغربي، وخصوصا من بعد الماتش المتواضع ديال ليكيب ناسيونال أمام الرأس الأخضر، وهو اللقاء اللي سالا زيرو لزيرو وكان نيفو عيان، لدرجة أن الركراكي طلب المسامحة من الجمهور اللي جا التيران مولاي عبد الله بالرباط يتفرج.
والتواجد ديال المهدي بنعطية مع المنتخب المغربي فهاد الوقت ما كيوضعش وليد الركراكي بوحدو فموقف محرج، ولكن كيحرج حتى الجامعة الملكية المغربية لكرة القدم، حيث كلشي كان كيطالب منذ سنوات بالكراطة داخل ليكيب ناسيونال وإبعاد السماسرة، وهذا الشي ماشي بعيد بزاف وغير ملي كان المهدي بنعطية كيلعب فالمنتخب الوطني قبل ما يعتزل ويولي حتى هو وكيل أعمال لاعبين.