الركراكي: أنا اللي جبت حمد الله للمنتخب وبوحدي اللي نصيفطو وماشي نتوما اللي كتحكمو

أكد الناخب الوطني وليد الركراكي أنه هو صاحب القرار الأول والأخير في استدعاء اللاعبين إلى المنتخب المغربي ولا يخضع لضغوطات الجماهير وعطى مثال بالمهاجم عبد الرزاق حمد الله وعلاش كيعيط له المنتخب بالرغم من أنه كان مستواه ناقص خلال كأس العالم الماضية.
ووضح وليد الركراكي وقال: "ما كنعيطش على شي واحد غير باش ندير لبوز، أي واحد معيا فلكروب يقدر يدخل يلعب ما بقاتش فحمد الله ولا واحد آخر، راه قلتها حمد الله ملي كنعيط له راه حيث كنشوق أنه يقدر يعطيني واحد ستيل ديال اللعب اللي ما عندناش بالمنتخب، ودابا كاين يوسف النصيري هو الأساسي الماتش اللي فات دخلت وليد شديرة حيث شفت أنه يقدر يعاونا على حساب الريتم ضد البرازيل وغدا حمد الله يقدر يدخل ويبدا ضد البيرو".
وكمل الركراكي وقال: "حتى واحد ما ضامن معيا التواجد فالمنتخب الوطني من اللاعبين الركائز بحال حكيمي مزراوي زياش سايس، فحال هؤلاء اللاعبين ضروريين وفالكروب كاينين لاعبين اللي يقدروا يدخلو ولا يخرجو على النيفو ديالهم، بحال حمد لله اللي ظل النيفو ديالو مزيان وكيماركي مع إتحاد جدة".
وزاد الركراكي وقال: "حمد الله يقدر يبقى ويقدر يمشي ويقدر يرجع، وماشي أنتم اللي جبتو حمد الله وماشي أنتم اللي غتحيدوه وملي جا حمد الله هذه المرة بغيت نقوليكم بلي ماشي أنتم اللي كتحكمو، حيث ملي كمنتم كتغوتو قبل كوب ديموند حمد الله حمد الله وحبتو للمنتخب كيصحاب لكم على قبلكم جبتو ولكن راه عيطت له حيث انا كنت كنأمن بلي يقدر يعاوني ومن بعد كوب ديموند بديتو كتغوتو بلي حمد الله ما عندوش بلاصتو فليكيب ناسيونال بينت لكم بلي انا اللي عيطت له، راه حمد الله إلى جا المنتخب الركراكي اللي عيط له وإلى مشى راه الركراكي اللي حيدو، هادش بالنسبة لحمد الله ولاي لاعب آخر فالمنتخب، وراه دخا فلكروب وهو لاعب كيجتهد وكيتقاتل وكيتسنى الفرصة ديالو وهذا علاش عزيز عليا".