كيفاش بوريطة ما بقاتش عندو الصحرا "نظارة" كتشوف بها بلادنا العالم وعوضها "قرآن" تحرق. استدعى سفير السويد على قضية ما عندنا بيها علاقة وسرط لسانو باش هجم علينا وزير فلسطيني

ف20 غشت من العام اللي فات كان رئيس الدولة حدد الاطار العام للسياسة الخارجية للبلاد. قال باللي ملف الصحرا هو النضاضر اللي يشوف بها المغرب العالم. اكد محمد السادس باللي هو "المعيار الواضح والبسيط" اللي كيقيس بيه "صدق الصداقات، ونجاعة الشراكات". فهاد الخطاب بمناسبة ثورة الملك والشعب فذكراه 69 كان واضح وبزاف "كنوجه رسالة واضحة للحميع". الرسالة هي ان الموقف من الصحرا كتحدد علاقات المغرب الخارجية.
لكن مع وزير الخارجية والتعاون ناصر بوريطة هاد الشي ولى من الماضي. علاش نشوفو كيفاش تعامل هاد الوزير مع تصريحات جبريل الرجوب وزير الشباب والرياضة فالحكومة الفلسطينية وامين سر اللجنة المركزية لحركة فتح. اي واحد من القياديين لكبار فالحركة واحد الرجالات المقربة جدا من محمود عباس باطرون "فتح" ورئيس السلطة الفلسطينية.
هاد الوزير صرط لسانو وما شفنا حتى شي موقف. ما طبقش اش حددو رئيس الدولة.
اللي غريب ان الوزير كيعطي الانطباع باللي بدل حتى اطار السياسة الخارجية للبلاد. شفناه استدعى سفير المغرب في السويد للتشاور على موضوع حرق القرآن من قبل عراقي فالسويد. ما كانش موقف الحكومة السويدية وشفنا بوريطة كيزايد. حتى العربية السعودية ما دارتش هاداك الشي اللي دارو المغرب. تركيا اللي كانت ديما كتلعب بالدين شفنا رئيسها عضو التنظيم العالمي للاخوان المسلمين ومحتضنهم كيفاش تصرف بعد حرق القرآن؟ واقف على السويد تدخل للحلف الاطلسي بعد ڤيتو دارو لاشهر. الا حنا كنزقزقو مع هاد بوريطة. هاد الوزير المسكون بحب الظهور كان خرج بيان قال فيه باللي استدعاء السفير جا تنديد بإحراق المصحف "وضرب مشاعر أكثر من مليار مسلم". واعتابر هاد الشي عمل عدائي غير مسؤول.
دابا شكون اللي مستفز للمغاربة؟ واش موقف فرد فدولة ديموقراطية بحال السويد واللي دانتو حكومتهم٬ ولا تصريح اقوى رجالات فتح ضد لبلاد فالجزائر؟
طبعا تصريح جبريل الرجوب اكثر استفزازا واهانة للمغرب. هاد القيادي قال فتصريح لقناة جزائرية على هامش دورة الالعاب العربية ان باللي كاينة "سمفونية لحنها الأمريكيون والإسرائيليون لدمج إسرائيل في منطقة الشرق الأوسط وشمال إفريقيا، وتجاوز القضية الفلسطينية فحصل تطبيع في الخليج وفي شمال إفريقيا. طبعا هنا كيقصد المغرب. غادي يزيد باللي الاتكاء على إسرائيل أو حتى على الولايات المتحدة لتصير الصحراء مغربية أو جزائرية، أعتقد أن اللجوء إلى الإسرائيليين أو أن إسرائيل يمكن أن تكون مصدر قوة لأحد أو إضعاف أحد غير صحيح ولن يكون" واكد انو "عيب استخدام اسرائيل كفزاعة".
وهدر على الاستفتاء في الصحرا اللي حتى الامم المتحدة ما بقاتش كتجبدو باش قال "الموقف الجزائري بالاحتكام إلى الاستفتاء والحوار مع الأشقاء وإقصاء وإبعاد أعداء الجزائر والمغرب هو الخيار أو النهج الصحيح".
هادا هاجم المغرب ومن الجزائر وما شفنا لا استدعاء لسفيرنا في فلسطين وممثلنا هناك عبد الرحيم مزيان. ما شفنا شي ديبلوماسي مغربي مشى من اقامة السفارة بحي الطيرة برام الله. ما شفنا والو.
الاهانة الاكبر للمغرب هو تصريح سفيرهم عندنا صالح الشوبكي اللي قال بغباء واستحمار للمغاربة كلهم ان تصريح الرجوب "فهم بشكل خاطئ" واضاف ان موقف فلسطين من الصحرا لم يتغير.
كيفاش سفير كيرد على اللي معينو وكيحكم فيه. اش هاد التخربيق. اللي كان خاصو يخرج هو محمود عباس ماشي موظف عاطينو سفارة فالمغرب.
المغرب كان يستدعي سفيرو ففلسطين للتشاور على هاد القضية كيف حددها رئيس الدولة ماشي على حرق قرآن.
بوريطة كيف عادتو ضارب الطم وكيهمو غير صورتو ويبان كيتبندر. وزير ما كيطبقش حتى اللي كيحددو سيدنا.
المغرب خاصو يوقف تعاملو مع منظمة فتح. الاسرائيليون كانو واضحين باش تسولو علاش ما تعتارفوش بمغربية الصحرا. ردو وعلاش الفلسطينيين ما معتارفينش بيها.
الصحرا هي نضاضر اللي كنشوفو فيها العالم وخاص وزير اخر فالخارجية يطبق هاد الشي. اما دوك صحاب فلسطين قضية وطنية فماشي وقت الهدرة عليهم