الخارجية رجعها بوريطة دار بوه داير بيها ما بغى مع ديك اللي جابها بلا استحقاق مكلفة بالتواصل. كيعرضو على اللي كيمجد هاد الوزير المغرور وكيدير لهاديك البنت "جيم" فتخربيقها على تويتر

وزير الخارجية والتعاون ناصر بوريطة رجع الوزارة بجال ايلى ملك بوه. كيتصرف فيها كيف بغى. كيعرض على اللي بغى. تخلف ما بعدو تخلف. الخارجية دومين رويال ماشي حكومي حسب الدستور. يعني عاد الوزير كيخدم السياسة الخارجية للبلاد ماشي داير بلاك ليست للصحافة.
كيعرض على صحابو اللي كيهدر مع بعضهم فالتلفون ويعاود ليهم بطريقة البيروكي شي تخربيق. دابا جاب نجلاء بنبمارك للتواصل. جابها بلا ما تكون فيها الشروط. داها للندن فخطة كان موجدها باش يقولو راه عندها تجربة. هاد بنت مسؤول كبير فالداخلية دافعو عليها فين ما مشات تخدم حتى وصلات لهاد الشي. هي كثر سكرتير لهاد لوزير المغرور كثر منها مكلفة بالتواصل.
فزيارة وزير الخارجية الاسرائيلي دارت السكرتير اللي عندها صفة مديرة لائحة بناسها فالصحافة. فيهم اللي كيبندق ليها. دارت اللي مع سعادة لوزير واللي ضدو. هذا ماشي نشاط غبي من انشطة هاد بوريطة. هادا حدث كبير. اول زيارة لمسؤول اسرائيلي كبير مند التوقيع على الاتفاق الثلاثي المغربي الاميريكي الاسرائيلي. يعني ماشي نشاط باش تخرج اللائحة السوداء. ماشي دار بوها ولا دار بوه هادي.
الصحفيين المغاربة كيتشكاو من هاد الاقصاء ليهم فحدث تاريخي اللي غايكون فيه توقيع اتفاقيات مع اسرائيل.
الخارجية الاسرائيلية جابت معها وفد من الصحفيين فيهم اللي ضد سياسة هاد الحكومة. حطو البلاد فوق كلشي. جابوهم باش يديرو تغطية لكل أطوار الزيارة اللي كيترأسها وزير الخارجية الاسرائيلي يائير لابيد اللي كيزور المغرب لأول مرة منذ استئناف العلاقات بين البلدين، بغاية افتتاح البعثة الدبلوماسية الإسرائيلية.
شفنا فشل هاد لوزير فقضية بيكاسوس. بان ضعيف وفضل يهرب ويخلي اخرين يدافعو. حتى الخرجة الغبية اللي دارها اختار مجلة كتاخد من المغرب لملايير من الاشهار، يعني كان ضامن ما غادياش تطرح عليه شي سؤوال قاصح.
سفير المغرب فباريس بنموسى دار حوار مع "جي دي دي" وكان كلامو مقاد ودفاعو ذكي. ماشي شعبوي غبي متخلف كيف دوج بوريطة.
واجب التواصل والحق في الحصول على المعلومة كتفرض على هاد الوزير يتواصل. الخارجية ماشي ديال باه. الخارجية قطاع حساس فالدولة خصوا كفاءات اللي كتحترم السلطة الرابعة. الخارجية ماشي ورث ال بوريطة او ال بنمبارك.