بيد الجامعة تعطي ضربة قاضية للنجارة ومنتحلي « الصحافة ». خاصها فمونديال لعيالات باستراليا ما تعطي حتى ريال راه بديك لفليسات كينوض البيع والشرا فشي جمعيات رياضية

قضية انتحال صفة صحافي فالمغرب غادية وتكبر. فالاعلام الرياضي كاين تسيب كبير. منظومة الفساد ناشطة ومحيحة.
المسؤولية جماعية. دابا نرجعو ليها. لكن كاينة نقطة غادية تضرب ضربة قاصحة هاد منتحلي الصفة. الكورة بيد الجامعة الملكية لكرة القدم.
اعتادت الجامعة بتشاور وموافقة جمعيات للاعلام الرياضي تعطي الف دولار او كثر فكل مناسبة كيكون فيها المنتخب المغربي لكرة القدم. سوا لعبو كأس افريقيا او كأس العالم. هاد العادة خاصها تسالي. شي جمعية رياضية كتبيع وتشري فالاعتمادات ومدخلة هاد لفلوس فالبيعة والشرية.
دابا فاستراليا لاعب المنتخب المغربي لكرة القدم للنساء مونديالو الاول. خدا قتلة لعصا بالفوت طبعا من لالمان وربحوه ب6 لزيرو فاول ماتش. مازال ليه كوريا الجنوبية نهار 30 يوليوز فأديلايد وماتش ضد كولومبيا فپيرت نهار 3 غشت.
باش توصل لاستراليا القضية طويلة وغالية، فالطيران خصوصا. باش توصل لميبلورن اللي لعب فيها المنتخب المغربي لكرة القدم ايلى بغيتي تجي فالطيارة خاصك ساعة ونص وفالتران 10 السوايع وبين اديلايد وپيرت باش تحضر للماتش الثالث الطيارة كدير كثر من 3 سوايع ونص. هادي كطلب وقت وكطلب مصاريف. بلا ما نهدرو على لوطيل والماكلة والتنقل.
يعني اللي جا خاصو يكون موجد.
دابا الجامعة كيف قلنا الكورة فيدها باش تساهم فالقضاء علي النجارة ومنتحلي صفة. ما تعطي حتى ريال حتى لشي صحافي. ما تفرقش لفلوس.
من هاد التظاهرة ما تبقى تفرق حتى ريال حتى حتى شي صحافي معتمد فشي نشاط بل خاصها تلعب دور مع مؤسسات بحال المجلس الوطني للصحافة والنقابات المهنية ماشي لمرايقية٬ فتنبيه الفيفا ومؤسسات اخرى لظاهرة النجارة ولقرايدية......اللي كيدخلو للصحافة.
لكن ايلى دارت الجامعة هاد المبادرة هاد المرة غادية تكون خطوة مزيانة. ايلى مشات عطات شي ريال غادي ينوض عليها الصداع. هاد الشوهة اللي واقعة لدوزيم والاولى بسباب هاد المؤثرين راه غادية تكبر بزاف. راه فيها فساد كبير بزاف. هاد النقاش يقدر يكون حجة للجامعة توقف تعطي شي ريال لشي صحافي. بغى يغطي بينو وبين الفيفا. اللي مفروض فالجامعة هو تعطي لخبار. لحد الان مع هاديك اللي جابوها من راديو مارس ما كتخليش حتى اللعابات يهدرو. ماشي اللي البروفيل المزيان.
العلاقة بين المنتخبات =الجامعة= والصحافة خاصها تكون مهنية اكثر. ما شفناش حوارات للعابة مع وسائل الاعلام المغربية اللي كاينة هنا. حشومة هاد الشي. حتى هاد لابروش خاصها تبدل. طبعا تغيرها مرتابط بتغيير عقلية الصحافيين والصحافيات اللي فالرياضة. يعطيو العز لريوسهم.