هدنة. علاش ما نتعلموش مع الكونگو والجزائر ومصر ونكونو كلها ورا الاسود ونخليو مواقفنا من المدرب وغيرو حتى بعد 29 مارس

واش ممكن الندوة الصحافية اللي غادي يديرها مدرب الاسود وحيد خاليلوفيتش بمجمع محمد السادس بمعمورة حدا الرباط٬ ندوة مختلفة. واش ممكن يهدر فقط علي الكورة ولا شيء علي الكورة. يهدر على اش موجد لماتش الباراج ضد منتخب الكونغو ذهاب لاربعا 23 مارس بالكونغو والاياب الثلاث 29 مارس بكازا.
واش ممكن نكونو مع الاسود ولو هاد الماتشات. نخليو كاع المشاكل اللي كاينة وكاع النقاط اللي مطروحة على المنتخب وعلى اللي داير بيه؟
دابا كاينة منتخبات رجعات ماتش الباراج المؤهل للمونديال قضية دولة. كلشي كيهدر بصوت واحد باش يجيبو التأهل. المنتخب اللي لاعبين ضدو مشى بعيد فهاد الشي. الرئيس الكونغولي براسو خدام باش يضمن اول مشاركة لبلادو فالمونديال. مجند كلشي من رئيس الحكومة حتى اخر حد فالجامعة. عطى كلشي باش يجيبو التأهل.
كلشي فهاد الدولة كيهدر بصوت واحد. ما كاينش اللي كيجبد شي حاجة سلبية او انتقاد فهاد الفترة. بعد ماتش 29 مارس فكازا واراك للنقاش للانتقاد للتقييم للهجوم بكلشي. المهم دابا فهاد الفترة كلشي ورا المنتخب ديالهم.
مصر ما نهدروش فهاد الموضوع. هادوك حتى الاعلام كيدخلو فيه وكيحددو كيفاش خاص التعامل مع المنتخب الاول فماتش بلادهم ضد السينغال. كلشي ورا محمد صلاح القائد والمدرب كيروش واللعابة. كاع القنوات. شعب كلو.
الجزائر اللي لاعبة ضد الكاميرون كتعيش نفس الاجواء. من رئيسهم وحتى قائد الجيش مع المدرب بلماضي واللعابة.
علاش حنا نكونو استثناء. علاش ما تعلنش هدنة. ندوة اليوم ديال وحيد ممكن تكون بداية هاد الهدنة. الاسئلة تكون على الماتش. من حق اي صحافي يسول اللي بغى. هادي داخلة فالحرية. لكن ممكن الاسئلة تكون على الماتش. على الاعداد. على اللعابة اللي حاضرين....
13 يوم هدنة ممكن جدا. من بعد يجي لحساب. ديك الساعة حسب النتيجة. ممكن تكون النتيجة ايجابية وتطالب برحيل المدرب اللي ما قنعكش. المهم تخلق اجواء مزيانة.
صعيبة للعابة كيشوفو بعض الجماهير باغية تشجع الكونغو وما يتأثرش وما يدخلش للماتش تالف. صعيبة للعابة كيشوفو كيفاش كيتهاجم المدرب او غيرو وفنفس الوقت يدخل بمورال مزيان.