ودابا يدخلو ليك صحابك. اليوسفي مول البارود جاب الربحة. 3 شكايات ضدو فامريكا بسباب اللي دار فالمدرسة الامريكية

جواد اليوسفي مول البارود فالمغرب جاب الربحة. هاد لملايري اللي دار بوه شلى فلوس باش كان صاحب ادريس البصري وزير الداخلية الاسبق ايام الحسن الثاني٫ جاب الربحة.
حسب مصادر « كود » ف3 من المدرسة الامريكية بكاليفورنيا قدمو بيه شكاية فبلادهم اي امريكا. وحسب مصادر « كود » منهم جوج استاذات واستاذ اخر. لحد الان٬ تضيف مصادر « كود » ما معروفش واش مدير المدرسة اللي كان دخلو اليوسفي لعكاشة وتسبب فازمة ديبلوماسية بين الرباط وواشنطن٫ من هادو ولا اللا.
القضية اللي كثار باغيينها تطوى٬ بدات باش هاد الرجل اللي كيتباهى بمعارفو وبصحابو لكبار بزاف فالبلاد واخا صعيب شي عقل منطقي يقبل هاد الفوحان ديالو٬ قلنا بدات باش قدم هاد لملايري مول فضايح فالبني فابن سليمان٬ بشكاية ضد مدير المدرسة الامريكية فكاليفورنيا فكازا. حرك الريزو ديالو وبناء على شهادة طبيب نفساني٬ هبط احد نواب وكيل الملك فابتدائية عين السبع٬ هاد المدير السبعيني الاميركي لعكاشة بلا ما يخبر المصالح القنصلية كيف كيقول القانون.
اتصل القنصل الاميركي فكازا بوزير الخارجية وبعد ساعات طلقوه. بعد ما حقق اش بغى هاد مول الباروك مشى كيقول. صافي راني سمحت للمدير ولشي حد اخر ولشي استاذات. دعا مدرسة. شفتو الضصارة.
هاد الفيلم كولو ناض على اتهام ولدو بتصوير فيديو لشي بنت فالطواليط. الادارة كانت صارمة وعاقباتو. حتى باش بغى يدوز الامتحان كان لاصق فيه حراس. سي لملايري اللي ما عرفش يربي ولدو بغى يربي الماريكان ودعاهم ودار تدخلات وطحنا ففضيحة
دابا القضاء الامريكي عند شكايات ضد هاد الراجل اللي طغى واستكبر. ونتبعو هاد الفيلم