مول البارود فوق عودو داير الحركة فالبلاد. كيفاش ولد صاحب البصري سبب ازمة مع ميريكان وما مسوقش وعلاش بحال هادو كيهددو النظام وباغيين يرجعونا بحال لبنان

مول البارود واسمو جواد اليوسفي كان سبب هادي ايام ازمة ديبلوماسية بين بلادنا وواشنطن. الفيلم بدا باش لقات المدرسة الامريكية فحي كاليفورنيا بكازا ولدو كيصور شي بنت فالطواليط. دخلات الادارة ودارت ليه عقوبة باش يكون عبرة. ولى كيدخل للمدرسة مراقب بحارس. ما يمكنش يتحرك بلا حارس حتى يغادر المدرسة.
طريقتهم فمعاقبة امثال ولاد لملايرية الباسلين بزاف بزاف. باواتهم وماواتهم موقعين على وراق كتسمح بهاد النوع من العقاب فهاد المؤسسة التعليمية التابعة لامريكا. لكن الاب اللي ضاسر بزاف بشبكة علاقاتو. اللي كيقول لكلشي باللي صحابو هما اللي كيحكمو لبلاد. اللي يقدر يدير ما بغى باش ياخد اللي بغى من اراضي. حقاش باش ضرب يدو فالبارود قلبها طاشرون. كلشي كيخاف منو. ايلى حط عينو على شي ارض واخا تكون تباعت كيقدر يرجعها ليه.
هاد العينة من لملايرية٬ مشى عند طبيب نفساني. دار شهادة طبية لولدو. دفعها للقضاء. المفاجأة باش تقدم مدير المدرسة وشي شخص اخر للكوميسارية٬ اكتاشف باللي متابع فحالة اعتقال. هادا راه عندو الجنسية الامريكية. اعتقال مماثل خاص تخبر المصالح القنصلية وكاينة مسطرة خاصها تتبع.
مع مول البارود كلشي كيطبق اوامرو. دخل للحبس المدير. ناضت القيامة. الاساتذة دارو احتجاجات. ترونات القضية. القنصلية الامريكية راسلات وزارة الخارجية المغربية فالقضية. الخارجية خبرات بدورها النيابة العامة. ازمة ديبلوماسية وصافي. ضرب للقضاء المغربي بتصرفات غريبة. بعد هاد الشي تقرر متابعة مدير المدرسة الامريكية فحالة سراح. طلقوه بعد ما دوز لعواكش.
ما كيهمناش دابا الفضيحة القضائية٬ قدر ما يهمنا كيفاش امثال هاد مول البارود توغلو فالدولة. هادو راهم ماشي تماسيح ولا عفاريت. هادو راهم عصافير. عرفتو علاش؟ حقاش كياكلو من فم التماسيح.
مول البارود اللي ولى طاشرون باش ترفح بزاف وعندو بوتيكات لماركات معروفة للحوايج ديال الرجالة فكازا والرباط كيتحرك كدولة. عندو گارد كور ديالو. عندو صحابو فالمخزن فكاع اجهزة الدولة. هادوك صحابو ما عندهمش حراس خاصيين وهو عندو. شوفو كيفاش الثقة فالدولة. طبعا بالاضافة لهاد الشي عندو باسبور امريكي بحالو بحال ولدو اللي تعاقب.
هاد العينة غادية بينا لنموذج لبنان. كل واحد ودولتو. دابا ايلى كنتي فالعقار وزغبك الله وخديتي شي مشروع وبانت لمول البارود فيه٬ مشى ليك.
الدولة خاصها تتخلص من امثال هادو. الدولة خاصها تتحرر من اللي صنعاتهم وعطاتهم ريع استيراد وبيع البارود فالبلاد ودابا يقدر يفجر كلشي.
شكون اليوم اللي قادر يقرب منو. كلشي خايف منو ما كاينش اللي ينتاقدو. حتى تجبدو صعيبة.
وفين غادية هاد لبلاد فين