تضامنا مع مول القرد. ماشي غير هو اللي انتاحل صفة صحافي علاش ما قربتوش من داك الطبيب وداك عبيد وديك جبارة وداك البركة وديك لبنى. علاش حگرو غير عليه وخليتو لخراين ينقزو علينا

حگرتو غير على مول القرد اللي ولى صحافي فمونديال استراليا للعيالات. هادا اللي خدا اعتماد من شي موقع خبير فهاد الشي ديال الاعتمادات للي ما كيمارش الصحافة واسمو عادل الرحموني وعندو"ماتش بريس" ومولاه دوز الحبس وصدق صحافي مهني وكيفرق الاعتمادات عبر جمعيتو. شوفو غير اش دار فقطر من كأس العرب حتى المونديال وشوفو شكون مثل جمعيتو.
دابا رئيس النقابة الوطنية للصحافة عبد الله البقالي كيف قال فحوار مع "تيل كيل" راسل الفيفا وسحبو الاعتماد ديالو. هو خرج ففيديو وخلط لعرارم.
السحب كان خاصو يكون ولكن خاص النيابة العامة تفتح تحقيق مع اللي عطاه الاعتماد اللي هو عادل الرحموني. ثم تفتح تحقيق مع مول القرد لانتحال صفة.
ولكن النقابة ما كانش عندها الشجاعة تراسل الفيفا على حالة حسن البركة اللي عمو هو الامين العام لحزب الاستقلال اللي جا باعتماد من جريدة "العلم" اللي مدير نشرها هو السي البقالي. هادا اللي كيبريكولي مع الرياضية ما فراسناش صحافي. كان كيسبح من شمال المغرب حتى جنوب اسبانيا ودار شي حوايج بحال هاكا. اليوم راه صحافي فاستراليا.
النقابة ما راسلاتش القناة الثانية "دوزيم" على هاديك "الفرقة" اللي كينتاحلو اعضاءها صفة صحافي كل نهار واخا ما عندهم الاعتماد ديال الفيفا. كيديرو خدمة ماشي ديالهم. كل نهار كينقز علينا هاداك الطبيب وهاداك سعد عبيد وهاديك لجواهري وهاديك جبارة. خداو شي 300 مليون وشفرو الكونسيبت وكيتخلصو. جايبين معاهم الشقيري مدير الماركوتينك فالقناة اللي ساكن معاهم فنفس لوطيل.
هادوك كيهينو مهنة الصحافة. علاش ما تراسلوش مدير دوزيم سليم الشيخ. علاش ما شفنا حتى احتجاج على ممارسة هادو لمهنة ماشي ديالهم. شفناهم فميلبورن كيديرو حوار مع سفيرة المغرب اللي مسالية وما عندها ما يدار تهدر مع امثالهم. ولكن هنا كيكذبو علي بنادم كيهدرو معاهم علي انهم من دوزيم ماشي شركة انتاج خارجية خدات مارشي بطرق باك صاحبي.
كان قرار سحب الاعتماد من مول القرد يكون حدث مزيان كون كانت الشجاعة ويحاربو الطفيليات على المهنة من امثال هادو