صحافيو "دوزيم" كاعيين من حقارة وعجرفة سعد ورباعتو وكيتاهمو الادارة: انتي اللي ضصرتيهم واش لفري لانس ما تخلصوش وهادوك مبرعين فاستراليا ما كيسلموش حتى على صحافيينا

عبر عدد من الصحافيين ف"دوزيم" فاتصالهم مع "كود" على فقصتهم من تصرفات ادارة القناة اللي كتجامل وحدين كينتاحلو صفة صحافي وما عندهمش لا مع الكورة لا مع الرياضة وكيمشيو يتفطحو فاستراليا.
اللي قلق الصحافيين والصحافيات اللي هدرات معاهم "كود" هو اللي وصلهم من استراليا على تعامل رباعة سعد عبيد ورباعتو المتكبر الواطي مع صحافيي "دوزيم" هناك "حنا عارفين اللي مشى من "دوزيم" داير خدمة مزيانة ومهنية ودايرين كثر من جهدهم. هما ما محتاجين حد. غير كاين حد ادنى من المروءة. باش يدوز شي تافه من هادوك الرباعة وما يسلمش حتى على هاد الصحافيين٬ راه كنعتابروه اهانة للقناة كلها. هادوك الرباعة ديال الفرقة راهم كيسولو باسم القناة. كيخدمو باسم القناة. كيديرو خدمة ما هي صحافية ما هي ديڤيرتيسمون باسم القناة. اقل ما يمكن يدار باش يتلاقاو مع صحافيينا٬ يسلمو عليهم ويهدرو معاهم".
صحافيو "دوزيم" حملو الادارة هاد التصرفات لمبرهشة من هاد الفرقة"٬ اخرون قالو باللي قلقهم كثر ماشي غير خسة هادوك الربعة٬ ووضحو فتصريح ل"كود"٬ باللي ما فاهمينش كيفاش هادوك مبرعبين على ظهر "دوزيم" وبفضلها وصحافيين فريلانس مازال ما تخلصوش حتى اليوم.
الصحافيون اكدو ل"كود" باللي هاد الشي كيخلق اجواء خايبة فالقناة.