شوفو العقليات. فالشمال باش تعمر الدنيا شي وحدين كيبداو يسبو ويتشكاو من الزحام وباغيين لمدينة خاوية وفمالگا وڤلنسية الدنيا مطرطقة وكلشي فرحان بهاد الرواج

"طنجة نختنق" و"العطلة عذاب" وعدد كبير من الاوصاف لعدد من سكان من اصول طنجاوية او ريفية لعروس الشمال. كاين اللي خرج بتدوينات كتسب كاع. هادو ماشي ناس عاديين اللي كيقولو هاد لكلام. هادو محسوبين على المثقفين يا سيدي.
شي وحدين كيجعرو باش يلقاو لمدينة محركة اقتصاديا. عامرة بالطونوبيلات. همهم غير يشوفو طنجة بيطوريسك. خاوية من الناس. ميتة. ما فيها ما يدار. يخرجو يقاو لكراسى فالطيراس ديال القهوة اللي كيمشيو ليها ديما. يدوزو للريسطو او البار يلقاوه يصفر. هنا كتعجبهم لمدينة. كيبداو يشعرو عليها.
كيتشكاو من لغلا كيتشكاو من الزحام. كيتشكاو من كلشي اللي كيخلي لمدينة حية وناشطة ومروجة اقتصاديا. نفس الاشخاص تقدر تلقاهم قطعو لبحر من طنجة المدينة لطريفة فالجنوب الاسباني. خاصهم ساعات باش يتحركو من بويرطو بانوس لفوينخيرولا وباش يدخلو لمالگا هاد ليام ما تقدكش ساعة. غير هنا ما يخلوش فامهم. كيسكتو.
الصبليون كيحتافلو بهاد الزحام. فكاع قنواتهم واذاعاتهم وصحفهم فرحانين بنسبة الحجز لكبيرة فلوطيلات. فبني دورم فجهة ڤلاناسيا عمرو لوطيلات بنسبة 95 بالمائة وفمالگا مع لافيريا فاتت 90 فالمائة. كيناقشو هاد الرواج وباش تاكل فريسطو وسط مالكا ولا ماربيا ولا بويرطو بانوس خاصك تسنى ساعات. ايلي بغيتي تحجز فشي ريسطورات٬ خاصك تعطي رقم لكارطا بانكير ديالك. ايلى ما جيتيش ياخدو نسبة. هاد الشي كانو دايرينو غير فمطاعم معروفة وقليلة٬ دابا كثرات هاد العملية.
ما كاينش اللي يتشكى. لوطيلات بحال واحد فباسيو ماريتيمو ففوينخيرولا كان ايلي غلى يدير 120 اورو وممكن تاخدو ب60 اورو دابا ولى كيدير 350 اورو وشوف واش تلقاه ولا اللا. فالفنيدق والمضيق غير يطلع الثمن شوية يبدا كلشي يتشكى. شوفو شحال الثمن طلع. ماشي الضاعف. تضرب ف4 او 5.
دابا هاديك العقلية ديال نشوفو طنجة خاوية عقلية ضد طنجة. ضد الرواج الاقتصادي للبلاد وللمدينة. ممكن تحتج على البنية التحتية. على وسائل الترفيه فالبحر. على النظافة. على العرض الثقافي اللي كيناسب الصيف. على نقص السهرات. على جودة العرض. لكن ماشي على الثمن. راه كاين عرض وطلب. من حق لوطيلات وصحاب الديور يكريو بثمن مختالف علي ثمن الايام العادية.