ها انتوما يا لمغاربة اش كيتسناكم ايلى احتارمتو الحجر مزيان. نص اسبانيا دخل المرحلة الاولى وها اللي مسموح بيه – صور وفيديو

اليوم فالصباح سبانيا خرى بانت. ماشي سبانيا حالة الطوارئ ولا اسبانيا اللي قتل فيها هاداك الفيروس الغدار ديال "كورونا" حتى لهاد الساعة 26744 ومس 227.436 مواطن.
الناس خارجة بحال شي عيد. خرجات بعد شهرين من الصرامة لكبيرة فتطبيق حالة الطوارىء. ماشي كاع لقهاوي فتحو اليوم. غير شي وحدين اللي موجدين. هاد لقهاوي مسموح ليهم غير بالطيراس. الطيراسات عامرة بالكليان. شعب عزيز عليه النشاط والطيراسات والقصاير وعاش ازمة موحالش عاشها قبل.
المثير فهاد اليوم هو ان المتاجر اللي مساحتها قل من 400 متر عامرة. لا صحاب التوب لا صحاب لحوايج ديال الدراري الصغار ولا حتى لكبار كلهم ماشي عامرين بل صفوف طويلة بزاف كل زبون بعيد ما بين متر وجوج متر على صاحبو. باش تدخل دايرين تدابير صارمة. ها باش تغسل يديك ها ليگات ها طريقة باش تقلب ماشي كيف كانت قبل. كلشي تغير ولكن هاد العودة للحياة خلات كاع المواطنين متعاونين باش يتجاوزو هاد الشي.
فالمغرب واش ممكن نوصلو لهاد الشي؟
الارقام هاد الصباح عندنا كتيبن انو مستحيل يطلقو اللعب ف20 ماي. اكيد بعد العيد الصغير وماشي بعيد يوصل للعيد للكبير ايلى ما كل مغربي دار جهدو وبقى فخيمتو ايلى ما عندو ما يدار وينقص خيطي بيطي.
اليوم مع العشرة الصباح تسجلات 163 حالة جديدة ديال كورونا فيروس. وصلنا ل6226. الايجابي ان 205 من البارح لليوم تشافاو ووصلنا ل2759. غاديين نوصلو قريب ل50 بالمائة ديال الشفاء وما مات حتى واحد فالساعات الاخيرة. بقى عدد الوفيات 188.
غير هاديك 163 حالة مؤشر على ان لمغاربة ما محتارمينش الحجر الصحي. الجارة الشمالية باش توصل تخلي اليوم فالصباح نص ساكنتها لما سمته "المرحلة الاولى" راها دارت حجر حقيقي. البق ما يزهق. صرامة كبيرة بزاف بزاف. اللي ما دخلتش للخط ضرباتو للجيب. ذعيرة فيها 600 اورو وتقدر تطلع لاكثر من 3 الاف اورو.
هاد الحجر الصارم عطى نتائجو. اليوم كيف قلنا نصف اسبانيا ماشي كلها دخلات للمرحلة الاولى. لخراين بقاو فالمرحلة زيرو.
باش تفهمو ان المرحلة صفر كانت تسمح للاباء يخرجو مع ولادهم. ما يفوتوش اب او ام مع 3 الابناء خوت. مع الرياضة فالصباح حتى العشرة وفالعشية حتى لحداش واللي حداه لبحر سمحو ليه يدير رياضتو البحرية فالصباح وفالليل بالاضافة الى عودة الرياضيين النيفو العالي يتدربو بوحدهم وبقى الترانسبور ولكن تفرض على العمومي يدير الكمامات. هاد المرحلة بقات عند برشلونة وعند مدريد وعند جهات اخرى او مدن فبعض الجهات بحال مالگا وغرناطة فالاندلس اللي بقات فالمرحلة زيرو.
اش كتعني المرحلة 1؟ فيها ان المحلات التجارية اللي مساحتها اقل من 400 متر مربع تقدر تحل بالاضافة الى طيراسات لقهاوي ولكن غير 50 بالمائة من طاقتها ماشي كلها وخاص كل طابلة تكون بعيدة ب3 امتار هلى الطابلة لخرى. لوطيلات والاقامات السياحية تسمح ليها تفتح ولكن باجراءات كثيرة صارمة. فيها التباعد واجراءات عندها علاقة باستعمال الكمامات والجيل.
مسموح كذلك استمرار تداريب الرياضيين المحترفين بحال لعابة "لاليگا".
فهاد المرحلة الاولى ممكن لاول مرة الاحفاد يزورو جدودهم ولكن ما خاصش هاد التجمع يفوق 10 وبدات شوية الثقافة ترجع بفتح فضاءات ثقافية ولكن بشروط كثيرة وتفتحو اماكن العبادة والمكتبات والجامعات ولكن العدد ما يفوتش عشرين فاماكن العبادة.
وكاين رحلات داخلية بحال جزر الباليارس وجزر كنارياس. ممكن تسافر فطيارة ولكن التسافيرة خاص مبرر الخدمة او الصحة وغير 50 بالمائة من طاقة هاد الطيارة.
بعد هاد المرحلة جاية مراحل اخرى. اللي نجح فالمرحلة الاولى يطلع للثانية واللي فشل يبقى فمرحلتو
هاد الشي اللي وصلو ليه جا بعد صرامة كبيرة بزاف بزاف كيف قلنا. المغرب كاع المعطيات اللي فيه ماشي كحلا ولكن كون طبقو غير الحجر فهاد رمضان كون هاد الجايحة نقصات بزاف. دابا كلشي بيد لمغاربة. اش بغاو واش يرجعو يعيشو شوية من حياتهم قبل بعد العيد الصغير ولا غاديين يستمرو هاد الصيف فالدار وباش الارقام غادية تطلع الصرامة ديال الدولة غادية تكثار. كلشي بيديكم يا لمغاربة.
هاد الشي اللي كتعيشو اسبانيا ممكن يكون تجربة للمغرب حتى فقضية التدرج فالانتقال من مرحلة لمرحلة حسب الجهات وبل حسب المدن فكل جهة.