الحكومة والأحزاب فإسبانيا نايضين لرئيس إتحاد الكرة مول البوسة واجتماع طارئ يقدر يحسم المستقبل ديالو

صبح التحرش الجنسي داخل المنتخب الإسباني لكرة القدم للسيدات، أهم موضوع حاليا فإسبانيا، وهذا الشي بعد البوسة الشهيرة ديال رئيس الاتحاد الإسباني لكرة القدم لويس روبياليس للاعبة الإسبانية جيني هيرموسو فالفينال د كوب ديموند للعيالات وقدام ملكة إسبانيا.
وكان خرج رئيس الاتحاد الإسباني لويس روبياليس باش يعتذر على البوسة ديالو الشهيرة، وحاول يبررها بأنها جات حيث كان متحمس لفوز المنتخب الإسباني بكأس العالم، وتخلطو عليه المشاعر وطبعا هذا الشي ما كانش مقنع بالنسبة الإسبانيين اللي ما بقاوش باغيينو يبقى مسؤول على الكرة فبلادهم وكيطالبو بمعاقبتو.
ونايضة دابا على لويس روبياليس مول البالون فإسبانيا، وخصوصا بعد تصريح رئيس الوزراء الإسباني بيدرو سانشيز اللي اعتبر أن الاعتذار ديالو على بوستو الشهيرة للاعبة هيرموسو ما كافيش وأن داكشي اللي دار ماشي مقبول، وخاص يدير خطوة كثر من الاعتذار، وهذا التصريح فهموه بزاف من المتتبيعين اللي كيعرفو السياسي الإسباني البارز على أنها دعوة منو لرئيس الإتحاد الإسباني من أجل الاستقالة.
وحسب وسائل الإعلام الإسبانية، فالأحزاب السياسية فإسبانيا الأربعة الكبيرة، ومنظمات حقوقية نايضة كتحرك وكتضغظ من أجل توقيف رئيس الاتحاد الإسباني لويس روبياليس على المهام ديالو والمحاسبة ديالو على البوسة الشهيرة، معتبرينها تحرش جنسي وكيعاقب عليها القانون، وكاين اجتماع طارئ غدا بالاتحاد الإسباني لكرة القدم يقدر يكون حاسم فمستقبل الرئيس روبياليس، واخا ما تمش ادراج قضية البوسة فجدول الأعمال ديالو ولكن الكواليس كتحدث على أن الاجتماع الطارئ هو بالأساس على قبل بوسة لويس روبياليس للاعبة هيرموسو والتداعيات اللي خلفتها.
للإشارة، راه كلشي كيتسنا تداعيات أزمة الإتحاد الإسباني لكرة القدم، حيث الأخير حيث إسبانيا هي شريك للمغرب والبرتغال فالملف الثلاثي لتنظيم كأس العالم 2030، وحتى حد ما باغي قضية بحال بوسة رئيس الاتحاد الإسباني لويس روبياليس، يكون لها تأثير على الملف اللي كيبقى الأبرز لاحتضان النسخة المذكورة من المونديال.