المساعدات الإنسانية مزال كتوصل للمناطق المتضررة من الزلزال.. وها كيفاش داير لوطوروت بين كازا ومراكش وها شنو دارو الجدارمية لتأمين الطريق

على طول طريق السيار بين كازا ومراكش منذ ليلة البارحة الإثنين كانت حركية غير عادية ولمغاربة بينو على أنه شعب ديال التضامن والتآزر فوقت الشدة، وهادشي كان قالو سيدنا فخطاب سابق أمام البرلمان.
سيدنا كان أن "أن المغرب خاصو، اليوم، وأكثر من أي وقت مضى، إلى وطنيين حقيقيين، دافعهم الغيرة على مصالح الوطن والمواطنين، وهمهم توحيد المغاربة بدل تفريقهم؛ وإلى رجال دولة صادقين يتحملون المسؤولية بكل التزام ونكران ذات".
البارح وقفات "كود" على حجم هاد التضامن الشعبي الكبير اللي بينوه عدد من المغاربة مع ضحايا زلزال المناطق المتضررة نواحي مراكش، وكيف شافت "كود" الطريق السيار كلها عامرة بشاحنات هازة مساعدات إنسانية قادمة من مختلف المدن والمناطق ديال بلادنا.
هاد المساعدات جات من الرباط وكازا وفاس ومكناس وبني ملال وحتى من الشمال جات. الشاحنات كانت هازة مساعدات إنسانية كثيرة ومختلفة. كول واحد وباش بغا يساعد الناس المتضررة اللي تفجعات بهاد الزلزال المدمّر.
عناصر الدرك الملكي دارت خطة أمنية محكمة لتأمين جميع الطرقات فبلادنا اللي دازت منها هاد المساعدات الإنسانية اللي مزال متواصلة لحدود كتابة هاد الأسطر، وكيف وقفات "كود" وشافت فإن كوكبة الدراجات النارية ديال الجدارمية كانوا دايرين على شكل "سلسلة" متواجدة على كل نقطة تفصل بين منطقة وأخرى.
الهدف من هاد الخطة اللي دارتها القيادة العليا للدرك الملكي الهدف منها هو تأمين وصول هاد المساعدات، ومزال مجهودات عناصر الدرك الملكي متواصلة ويشرف عليها مسؤولون كبار في القيادة العليا للدرك الملكي.