جوج من عصابة البزناس "المدني" اللي شرملو جدارمي ف"كَيسر" بسيف طاحو بعدما تدخلات الفرقة الوطنية ومزال كيقلبو على المتهم الرئيسي

قالت مصادر مطلعة ل"كَود"، أن كومندو كيتكون من قائد سرية الدرك الملكي فسطات ومعاه عناصر من الفرقة الوطنية للأبحاث القضائية اللي جات من الرباط باش تبحث في واقعة الاعتداء على جوندارم، شدو البارح الخميس جوج أشخاص من ديك العصابة الإجرامية اللي هاجمت الجدارمي نهار الأربعاء وأصابته إصابات خطيرة بسيف، مللي كان مع دورية كانت باغا تشد بزناز، اللي صدق هو زعيم هاد العصابة، وسميتو "المدني "، أصلا روشيرشي على الصعيد الوطني بسباب الاتجار في المخدرات بشتى أنواعها.
هاد الدورية ديال الجدارمية اللي تعرضت، نهار الاربعاء اللي فات للهجوم مللي كانوا باغيين يشدو البزناز المذكور وصحابوا، واللي تسبب فإصابات خايبة بسيف لجدارمي هزوه للصبيطار ميليتير، من طرف البزناز قبل ما يهرب.
المصادر ديال "كَود" كتزيد تقول أن قائد سرية سطات وعناصر من الفرقة الوطنية اللي جات تشرف على هاد العملية تمكنو من توقيف جوج من العصابة الإجرامية وحطوهم فالحراسة النظرية بعد إشعار النيابة العامة المختصة التي أمرت كذلك بتعميق البحث معهما.
وحاليا البحث راه مازال متواصل باش يتشد زعيمهم المعروف "بالمدني".