بالفيديو.. "كود" أول وسيلة إعلام وصلات لدوار تامقرا ضواحي شيشاوة: كملات الطريق بالموطور

الوصول إلى دوار تمقرة المتواجد بالجماعة القروية "أسيف المال" شمال إقليم شيشاوة مكانش ساهل عند "كود". واجهنا صعوبات كبيرة بزاف باش وصلنا لهاد لبلايصة اللي ماتو فيها الناس بسبب الزلزال وتضررت ساكنتها نتيجة هاد الكارثة.
في طريقنا إلى الدوار البارح الخميس دزنا على منطقة مجاط البعيدة عن شيشاوة بحوالي 39 كيلو متر. ومن مجاط للدوار المذكور درنا تقريبا شي 20 كلم وأغلبها فالجبال. بطبيعة الحال كان صعب الطوموبيل توصل لدوار تامقرا.
طاقم "كود" كان مضطر يشوف شي وسيلة نقل لداك الدوار اللي تضررو الناس ديالها بزاف، قبل أن نلتقي إدريس لمهيمر رئيس الجمعية الخيرية الإسلامية اسيف المال اللي ضايفنا فمقر الجمعية ديالو وحتى الناس اللي معاه كانوا باغيين يعاونونا باش نوصلوا لداك الدوار.
بعد المجهود اللي درنا باش نمشيو للدوار لقينا الشاب "عمر" اللي وفر لينا وسيلة نقل عبارة عن دراجة نارية هزات مصور "كود" اللي غامر بحايتو فوسط الجبال باش يوصل لعند الناس اللي كاينين فالدوار.
لحظة وصول "كود" لهاد الدوار خدينا شهادات صادمة من الساكنة، وكلهم أكدوا باللي مجات عندهوم حتى شي وسيلة إعلامية سواء تسمع للهموم ديالهم، مؤكدين في ذات الوقت أن المساعدات وصلاتهم وباغيين دبا غير في يسكنوا.