فاطمة الزهرا المنصوري اللي بانت ضعيفة فاشرافها على قطاع السكنى والتعمير فحكومة اخنوش٬ خرجات الرابح الاكبر فزلزال الحوز. شفناها هادي يومين كتخرج كتهدر مع الناس باسم الملك. سيدنا عطاكم وسيدنا دار ليكم. ايلى ما سمعناش اش كتقول كتبان بحال ايلى فحملة انتخابية سابقة لاوانها. وزيرة فشلات فمعركتها مع الداخلية بخصوص الوكالة الحضرية لكازا. فشلات فملفات اخرى٬ حريصة على تصور كل تحرك ديالها. مسؤولة سياسية ما شفناهاش حتى فمديتنها مراكش اللي كترأس مجلسها وكدور فالحوزوشيشاوة واختارت يكون حداها هشام المهاجري برلماني حزبها عن شيشاوة. ما تقولوش لي هاد الشي ماشي سياسة. اييه سياسة. باش يتعطى للمنصوري الرئيسة الابدية للمجلس الوطني للبام ووزيرة السكنى وعمدة مراكش٬ الضوء الاخضر تنزل للزلزال دون غيرها من الوزراء المنتمين للاحزاب الثلاث المشكلة للائتلاف الحكومي راه سياسة. اللي كان خاصو يكون فالتيران مثلا هو نزار بركة وزير التجهيز والماء. شفنا اش دارت وزارتو باش كاع الطرقان الل ضررات بالزلزال تفتح. ولكن ما عطاه حد الضوء الاخضر ينزل. علاقات المنصوري بشخصيات مؤثرة فالقرار السياسي خلاتها تخرج. وظفات هاد العلاقات باش تعطاها ڤيترينا تبان فيها. طبعا هاد الشي ماشي مجاني. كيوجدو فيها لانتخابات 2026. لكن هاد الشي ما شادش بزاف. المنصوري ما تقدرش تمشي لانتخابات 2026 لاسباب كثيرة. يمكن نساء اخريات فالحزب قادرات. هي اصلا ما كتقدرش تكمل اجتماعات حزبية عادية كيفاش دير لحملة انتخابية ولمسؤولية كبيرة بحال رئاسة الحكومة. جهات فالدولة كتعرفهم مزيان معولين عليها. باقي للانتخابات 3 سنين. المهم خرجوها دابا. المحطة المقبلة خاصها تاخد البام. هادي مهمة صعيبة بزاف بزاف عليها. نتسناو ونشوفو. فهاد الزلزال نزل للتيران وزير الداخلية لفتيت عبد الوافي فليام الاولى. ماشي متحزب. ودابا مهليين فالمنصوري. كتبوس وتعنق وتهدر باسم الملك. حملة انتخابية وصافي. نتسناو تتمة هاد الفيلم المفروش
