عطية الله: الهدف ديالنا بعد إنجاز مونديال قطر هو نربحو كوب دافريك فالكوت ديفوار

أكد الدولي المغربي يحيى عطية الله، بللي الهدف الجاي عند المنتخب الوطني المغربي اللي باغيين اللاعبين يحققوه هو يربحو كوب دافريك "كوت ديفوار 2023′′، وهذا الشي بعدما دارو إنجاز كبير فمونديال قطر بالوصول إلى الدومي فينال.
ودوا يحيى عطية الله للموقع الرسمي ديال الجامعة الملكية المغربية لكرة القدم، وقال: "من بعد المونديال كلشي ولا كيدوي على المنتخب الوطني المغربي وعلى الإنجاز ديالو وحنا فخورين بداكشي اللي حققنا ولكن مازال ما وصلناش لنقطة النهاية ومازال تابعنا كوب دافريك اللي كنتمناو أننا نحققوه فالكوت ديفوار".
وبخصوص مواجهة الكوت ديفوار فماتش أميكال وليبيريا ضمن إقصائيات كأس إفريقيا، قال الظهير الأيسر للمنتخب المغربي: "الماتشات الجايين ضد الكوت ديفوار وليبيريا مهمين بجوج وغادي نوجدو فيهم لكأس إفريقيا، غنخدمو فيهم ونطبقو تعليمات المدرب باش نشوفو النيفو اللي وصلنا له ونقاط القوة ونقاط الضعف ديالنا".