الوداد واجدين لماتش إنييمبا: الواك سالاو الاستعدادات ديالهم ودخلو الكونسونطراسيون ومعولين على الرباح (تصاور)

سالاو الوداد الرياضي الاستعدادات ديالهم لماتش إياب ربع نهائي السوبر ليك الإفريقي أمام إنييمبا النيجيري، واللي غيتلعب غدا الخميس فستاد دونور مع 7 الليل.
ودارو الوداد الرياضي حصة تدريبية أخيرة قبل الماتش ضد إنييمبا، وكانت هاد العشية فتيران بنجلون فكازا، وفيها خدم المدرب عادل رمزي مع اللاعبين على السيستيم اللي غيلعبو به ضد الفريق النيجيري.
الأجواء فالوداد الرياضي زوينة بزاف، وهاد الشي بان فالحصة التدريبية، حيث اللاعبين كانوا ناشطين وموتيفين ومن الحركات ديالهم كيبانو مرتاحين وعارفين كيفاش يحيدو عليهم الضغط ديال الماتش.
الوداد الرياضي ومن بعدما سالاو التداريب ديالهم خداو الكار ديال الفريق ومشاو للفندق اللي كيبركو فيه فكازا، وتما دخلو الكونسونطراسيون ديالهم هاد الليلة، في انتظار المباراة ديال غدا.