ما كيناش الراحة.. الوداد بداو كيوجدو للدومي فينال ضد الترجي وحاطين العين على فينال السوبر ليك

مازالين الوداد الرياضي داخلين فالمعسكر التدريبي ديالهم، وبداو من دابا كيفكرو فدومي فينال السوبر ليك الإفريقي ضد الترجي التونسي الاثنين الجاي، باش يوجدو له.
وغيديرو الوداد الرياضي حصة تدريبية اليوم الجمعة فالعشية فتيران بنجلون فكازا، وغتكون حصة تدريبية خفيفة غيحيد بها المدرب عادل رمزي والطاقم ديالو عيا ماتش البارح ضد إنييمبا النيجيري من اللاعبين، ويديرو لهم تمارين باش يرجعو لهم لافريشور فيزيك.
الحصة التدريبية، من المنتظر تعرف حضور بولي صامبو وغياب حمدو الهوني اللي عندو إصابة، فالوقت اللي مازال أرسن زولا ما واجدش وكيتدرب غير بوحدو.