سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
المغرب داير فحال شي مرا زوينة و لكن حشمانة تبيّن الزّين ديالها للعالم ! عندنا حشيش واعر و العالم كلّو كايهضر عليه و كايستاغلّوه فهولاندا باش يجيبو السيّاح و حنا مّالين الدّار مازال حشمانين منَو !
فاش كاتسول شي اجنبي شنو كاتعرف على المغرب ؟ كايقوليك الطاجين و الجو الزوين و مراكش و الكسكس و شنو آخر ؟ الحشيش ! الحشيش المغربي ماركة مسجلَة فالعالم كامل و خصوصا فالكوفي شوبات ديال هولاندا فين كاتلقاه محطوط فحال شي ملك وسط الانواع الاخرى ديال الحشيش لي جاية من بلايص اخرى من العالم ! و كايشريوه العشّاق ديالو فحال لي كايشريو العشّاق د كوكا كولا المنتوج ديالهم المفضّل ! ايه الحشيش مخدّر و طبعا ماغاديش ننصح شي حد يستعملو و لكن هادشي ماكايمنعش انه كاينين مغاربة بزّاف كايستعملو الحشيش و داخل فالمعيش ديالهم اليومي ! كاين لي الطريفة ديالو اعز عندو من الخبز بل و اعز من صاحبو و صاحبتو ! صاحبتو تقدر تغبر عليه و هانية تمشي مرا و تجي مرا و لكن طيح ليه شي طريفة من الجيب راه مصيبة كبيرة و كارثة و غاتلقاه كايقلب عليها بالفتيلة و القنديل و كايطلب الله من قلبو الخالص و بكل خشوع باش يلقاها ! و لا مالقاهاش كايكعى و يتعصّب و ينعل جد ام النهار لي تلفات ليه فيه الطريفة الحنينة ديالو ! الحشيش بگاع الاشكال ديالو كيف و معجون و طريفة و زيت و و و ... جزء من التاريخ المغربي و الهوية المغربية واخا القانون سنوات و هوا كايعاقب عليه ماصوّر منّو والو ! مازال الناس كايزرعوا و كايبيعو و كايستهلكو ! و شنو الحل ؟ الحل هوا التقنين و ماشي التقنين د الزراعة بوحدها فحالي دايرين دابا لا التقنين ديال الزراعة و التثمين و الاستهلاك حتى هوا علاش لا ؟! بالعكس انه الانسان يمشي لمحل اختصاصي فالحشيش و يشري الطريفة ديالو مراقبة من طرف لونصا راه احسن الف مرة من انه يشريها من عند بزناس ماعارفش شنو مخلّط فيها ! بلا مانهضرو على الاستفادة لي غاتستافدها الدولة من تقنين هاد النشاط و الضرائب لي غاتنعش الاقتصاد الوطني. طريفة مراقبة من طرف لونصا و لا شي مكتب مختص فالمراقبة كاضمن الجودة للمواطن و كاتحميه من الابتزاز و الجرائم لي يمكن يتعرض ليها و هوا كايقلب يشري طريفة ديالو ! و فاش كايعدّل الدماغ ديالو كايعدّلو مزيان ! حيت ماشي معقول واحد هولاندي جدودو ماعمّرهم شافو زريعة د الحشيش كي دايرة يكون عندو الحق يكمي المزيانة و وواحد مغربي جبلي الجدود ديالو طورو الزراعة د الحشيش و خلاو المغرب يولي من اكبر المصدّرين ديالو يبقا يضرب فالخردالة هبَالة حتى يتفلاشا شي نهار !
