سعيد شيبا: كنا مزيانين ضد الإكوادور وها فاش غلبونا وهدفنا مع الأشبال ندخلو نتأهلو فماتش أندونيسيا

عبر الناخب الوطني سعيد شيبا على رضاه بمستوى المنتخب الوطني المغربي لأقل من 17 عام فالجولة الثانية من مونديالU17، رغم الخسارة مع الإكوادور وأكد أنه غيوجد اللاعبين الماتش الثالث المصيري ضد إندونسيا لتحقيق التأهل للدور الثاني.
وتحدث سعيد شيبا بعد خسارة الأشبال بنتيجة 2 لزيرو مع الإكوادور وقال: "الماتشات ما يمكنش يعطيوك فترات مزيانة كثيرة، جاتنا فرصة فالشوط الأول كنا مزيانين تنظيميا والهجوم كان مزيان ولكن ما قدرناش نماركيو مع منتخب قوي بحال الإكوادور فريق متمكن وقوي بدنيا".
وزاد وضح الناخب الوطني: "التغييرات اللي درنا للأسف ما عطاتس هاديك الدفعة اللي كانوا محتاجينها الوليدات واخا غيرنا بكري فبداية الشوط الأول ملي استقبلنا الهدف ولكن هادشي ديال المرحلة السنية خاصنا نخدمو باش نكونو ناجحين هجوميا ونحافظو على المكتسبات اللي عندنا، والمنتخب الإكوادوري تفوق الكورات الطويلة والدوزيام بال، والعامل المهاري واستغل الفراغات ملي كنا كنطلعو نهجمو".
وبخصوص الماتش الجاي المصيري مع إندونيسيا المستضيفة وفرص التأهل للدور الثاني قال سعيد شيبا: "ماتش أندونيسيا غنوجدو له كيفما وجدنا الماتش الأول والثاني والهدف هو استرجاع الطراوة البدينة ديال اللاعبين وخصوصا بالنسبة للاعبين اللي لعبو 2 ماتشات، والوقت ما كافيش والأسبقية لإراحة اللاعبين ونحافظو على المكتسبات التنظيمية اللي عندنا ويتمون لافريشور فيزيك عند الفريق وتدوير اللاعبين فمسابقة منظمة فبلاد بحال إندونيسيا فيها الرطوبة مرتفعة كيكون مهم وما كيبقاش عندك خيار من غير انك تقلب على الأجهز بدنيا والهدف ديالنا هو التأهل للدور الثاني".