الشرعي: هدفنا الأول هو تأهل المغرب إلى أولمبياد باريس ومالي منتخب قوي وكنا كنتسناوه وها لافونطاج ديالنا

أكد الناخب الوطني عصام الشرعي مدرب المنتخب المغربي الأولمبي، أن الهدف الأول ديال ليكيب ناسيونال غدا الثلاثاء فالدومي فينال د كوب دافريك لأقل من 23 عام، هو التأهل لدورة الألعاب الأولمبية "باريس 2024".
وتحدث عصام الشرعي، خلال الندوة الصحافية اللي كتسبق ماتش المنتخب الوطني المغربي الأولمبي ومنتخب مالي فدومي فينال كأس إفريقيا، وقال: "حنا مركزين على التأهل إلى دورة الألعاب الأولمبية باريس 2024، وهذا هو هدفنا الأول".
وكمل الناخب الوطني وقال على مالي: "حنا كنا متوقعين نلعبو مع منتخب مالي وعلى الأقل فالدومي فينال، حيث هم اللي قساو منتخب السنغال وهذا كيبقى واحد من المنتخبات الإفريقية الكبيرة والماليين عندهم إمكانيات كبيرة ولاعبين مزيانين، وبحال جميع الخصوم غنوجدو لهم وغنشوفو نقاط الضعف ديالهم والقوة ديالنا".
وزاد وضح الشرعي: "غنلعو فبلادنا وغنحاولو نطبقو عليهم داكشي اللي بغينا حنا وغندخلو باش نربحو، والمهم نماركيو بكري فالماتش وهذا أحسن سيناريو ممكن وما يماركيوش علينا، ولكن ما ننساوش أن مالي حتى هم غيكونو متحمسين، حيث أول مرة غيلعبو حتى هم الدومي فينال".
وكيشوف الشرعي أن تيران مولاي عبد الله بالرباط هو أفونطاج بالنسبة للأشبال وقال: "اللي غيعاونا هو أن جميع ليماتش لعبانهم هنا فالرباط التيران كنعرفوه ومولفين عليه، واللاعبين غيكونو واجدين وعارفين أنه ماتش مهم وأول أوبجيكتيف ديالنا هو نتكاليفاو للألعاب الأولمبية خصوصا، وأننا ما تأهلناش لها من 2012، وراه داز وقت طويل ونتمناو هذا الجيل ياخذ بطاقة التأهل".
للإشارة، فعدد المنتخبات اللي غتأهل إلى دورة الألعاب الأولمبية باريس 2024 من كأس إفريقيا لأقل من 23 عام "موروكو 2023" هو 3 منتخبات، والأمر كيتعلق بالبطل والوصيف ومول المركز الثالث، ودابا المنتخب الوطني المغربي غيلعب مع مالي فالدومي فينال والتأهل ديالو للفينال كيعني أنه تأهل لأولمبياد باريس 2024.