ها علاش قلناها باش بدا هاد الملف ديال ايسكوبار افريقيا. راه الضربة للكورة فبلادنا والصمت تواطؤ مع هاد الهجوم. ها صحافة الجزائر ربطات "نهضة الكرة المغربية باموال الحشيش والكوكايين"

من نهار نشرات "جون افريك" مقالها على المالي اسبكوبار افريقيا بانت القضية فيها "إن". هاد المجلة ما تقدرش تكتب فموضوع بحال هادا. الصحافية اللي دارت اللقاء وهدرات على تورط رئيس نادي كبير ورئيس جهة فالمغرب٬ ما فراسها والو. الفيلم باي من اللول. هي غير موصلة الخبز للفران وصافي.
مجلة معروفة علاقاتها ببلادنا. هادي مهمة دارتها ماشي تحقيق. شكون عطاها توصل لهاد المهرب لكبير المعروف بالمالي وكيفاش تواصلات معاه ومنين جاتها المعطيات. خروب بلادنا هادا.
الفيلم من اللول باين. باغيين رئيس الجهة الشرقية ورئيس الوداد البيضاوي.
من بعد غادي يتفتح تحقيق تكلفات بيه الفرقة الوطنية للشرطة القضائية فكازا باشراف الوكيل العام لدى استئنافية كازا. الخطأ القاتل اللي دار هو عدم اصدار اي بيان فالموضوع من قبل النيابة العامة. فجميع دول العالم اللي كيخرج الوكيل العام ماشي ببيان بل بتصريح وكيجاوب على الاسئلة. كيراعي سرية التحقيق ولكن كيهدر باش ما يطيح باطل على حتى حد. كيكون تواصل على حساب مجريات التحقيق. ديك الهدرة ديال سرية التحقيق وما نقولو والو شوفو فين وصلاتنا. ضربات لبلاد كلها. هاد ليام صحافة الجزائر يالله وصلهم الملف بعد التسريبات اللي ما عندها لا ساس ولا راس وتنشرات هنا فالبلاد بلا ما تحرك النيابة العامة لاستنطاق ماليها. ياك قلتو سرية التحقيق. المهم صحافة الجزائر ضاربة لينا الطر. كتقول باللي القاب الوداد البيضاوي فالقارة الافريقية والمنتخب المغربي لكرة القدم فالمونديال كلها مشبوهة وربطوها بفلوس المخذرات والكوكايين.
هاد الربط حنا اللي زرعنا الشكوك باش يكون. قضاءنا سكت على ملف كبير. كان يخرج ويكشف للرأي العام مجرياتو. راه موضوع غاية فالحساسية ماشي موضوع ساهل. كيهم ماشي نادي كروي او حزب سياسي. اللا. كيهم صورة لبلاد. كيضرب الصورة المشرقة لكرة القدم المغربية. كيشكك فنتائج منتخباتنا اللي دارت خدمة سنوات هادي من القاعدة باش نوصلو لهاد النتيجة. جات صحافة الجزائر اليوم وبتواطؤ الصمت عندنا هنا فالبلاد٬ باش تضرب كلشي فزيرو
هادي غير البداية. استمرار الصمت بلا اشارة ولو ببلاغ على فين وصلات القضية غادي يخلي دول اخرى تكتب على الموضوع. الجزائر عندها مشكلة مع البلاد كلها. جهات اخرى غاديين يصفيو حساباتهم مع بلادنا بطريقتهم.
راه لبلاد اللي وصلات لنصف نهاية كأس العالم واللي منتخباتها لا رجال لا نساء وبگاع الفئات دارت نتائج كبيرة وفوق هاد الشي كاين تنظيم كأس العالم المشترك مع اسبانيا والبرتغال ف2030 وقبلها كأس افريقيا وكاين رباح رهان زلزال الحوز اللي خلى شي دول ما ترضاش بموقف المغرب الرافض لمساعداتهم وكاين تحركاتنا فافريقيا اللي كيضايق اكثر من دولة..... كلشي هاد الشي وامور اخرى كيخلي بلادنا تحت المجهر. كلشي كيتسناها فالدورة.
الفقصة ان اللي تسناها فالدورة هاد المرة هي جهات فالبلاد. عطات كادو لهادوك الدول باش يضربونا.
كاين القانون وكاين قريبة البراءة. ايلى كان شي حد متورط فشي ملف كان كان خاصو يحصل هادي مدة طويلة ماشي اليوم. حتى لنفرض يالله بانت معطيات٬ وخاص اطلاق الرأي العام بيها. ماشي التفاصيل الدقيقة ولكن يخرج يقول الوكيل العام باللي كاينة ابحاث. كاين استماع لاعضاء. كاين تحقيق.
مازال للنيابة العامة عندها هامش تتحرك. مازال بيان من بياناتها يبعد الشبهة على بلاد كلها. كل انتظار غير كتخليو الاشاعة تكبر وتصبح هي الحقيقة الوحيدة