"فين فلوسكم" نوضات حرب لفاسة بين المحامية الشهيرة بسمات الفاسي وبنجلون. اييه بغى يدير فيها "محمي" ولكن راه هدر على فضايح واختلاسات بالملاير واتهام للقضاء. خاص تحقيق داخلي وعوض الاهتمام بصورة البعض نديوها فصورة بلادنا

البارح لخميس نشرات جريدة "الصباح" فصفحتها الاولى مقال بعنوان "محميون من فرنسا يشككون في القضاء"٬ هدرات فيه على "فار من العدالة" اللي "نصب واحتال على شركة في مليارين ونص" اللي رفع "شكاية بباريس".
الجريدة هدرات على استهداف القضاء المغربي والتشكيك فنزاهتو والتشهير بمحامية بالدار البيضاء وانو معتقد ان جنسيتو الثانية غادية تحميه.
الموضوع مهم. هنا فكود كنا هدرنا قبل ايام على شكاية رفعها فريد تويمي بنجلون مديرعام "فين فلوسكم" ضد المحامية الشهيرة بزاف بزاف بزاف بسمات الفاسي الفهري. بجوج فاسة ومن عائلة. لفلوس خاصماتهم ووصلاتهم للدعاوي
بالفعل هاد بنجلون كيف قالت "الصباح" كيعتاقد انو "محمي" من فرانسا. فالشكاية اللي توصل بيها مكتب مكتب مدعي الجمهورية بمحكمة باريس في 2 يونيو الفايت ضد المحامية المغربية لي عندها مكتب بسمات وشركاؤها فكازا٬ كيهدر علي وطنو "فرنسا" واخا عندو الجنسية المغربية.
القضية اللي ثارتها "الصباح" كذلك وهي اهم من قضية "المحميون"٬ وهي استهداف القضاء المغربي. نوقفو غير عند هاد الشي بلا ما نزيدو شي صفة اخرى. دابا الشكاية عند القضاء الفرنسي. نشوفو فين غادي يكون مسارها. ولكن راه هدر هدرة خطيرة كتخلي اي مغربي غيور يوقف ليه شعرو.
بنجلون تويمي فريد اللي من عائلة المحامية القوية جدا بسمات الفاسي الفهري هدر على استغلال النفوذ والتدخل فالقضاء واختلاسات وانشطة مشكوك فيها فيها تكوين اصول عقارية بشكل غير قانوني... اييه هادا سبق تحكم عليه بالنصب ورفضات شكاية تقدم بيها كيقول باللي وقع تحت الاكراه اعتراف بدين بمبالغ مالية.
دابا القضية المهمة اليوم ماشي صورة هادا او داك٬ بل صورة لبلاد. باش شريكنا الاستراتيجي فرنسا توصلها شكاية بحال هادي واخا مازال ما بتش فيها القضاء الفرنسي٬ كتمس صورة القضاء فبلادنا. خاص فتح تحقيق محايد من السلطات القضائىة المختصة فهاد الاتهامات.
هادا كان مدير عام ومسيرلسنوات للشركة. كيعرفها مزيان. كيعرف شركاؤو منها ومنهم المحامية بسمات. صورة لبلاد اهم من كلشي. فهاد الشي راه ممكن يكون هاد بنجلون غير كيكذب وكيدعي وكيختالق هاد الشي٬ عليها خاص تحقيق.
خاص هاد التحقيق يدار وتنشر نتائجو. يمشيو حالة بحالة. يرجعو كاع القضايا ويشوفو واش كان شي تأثير او لا. يشوفو المسطرة من الف حتى الياء ويعرفو اش وقع وشكون دار شكون.
هاد القضية جات مع محمد عبد النباوي الرئيس المنتدب الجديد للمجلس الاعلى للسلطة القضائية ومع الوكيل العام الجديد للمملكة الحسن الداكي. واش بقضايا هادي ممكن يستهدفوهم ويستهدفو الخدمة لكبيرة اللي يالله بداوها؟ كلشي ممكن وممكن يكون الاستهداف جاي من الداخل كيفما ممكن يكون من الخارج وممكن يكون شي تحالف بيناتهم كاع.
اذن اللي كيحمي صورة بلادنا هو تحقيق على هاد الملف. ايلى تقبلات الشكاية المغرب غادي يكون فحرج كبير. حرج ما محتاجينوش بعد ايام من الضربات الخايبة اللي ضربنا بيها جزء من الدولة الفرنسية فقضية "پيگاسوس".