شوفو هاد لكمامر. "كذب ابيض" لاسماء المدير ربح النجمة الذهبية لمهرجان مراكش. سينمائية ما خداتش حتى الدعم وما عمرهم عرضو عليها للمهرجان واليوم راكبين على نجاحها

السينمائية المغربية اسماء المدير اليوم السبت 2 دجنبر 2023 بمراكش عاد تنصفات شوية فبلادها. ربحات بفليمها "كذب ابيض" النجمة الذهبية = هي الجائزة الكبرى= للدورة العشرين لمهرجان مراكش للفيلم.
الاعلان على الجوائز دار قبل قليل اليوم السبت 2 دجنبر 2023 بقصر المؤتمرات بعاصمة البهجة.
علاش شوية تنصفات؟ حقاش هاد السينمائية تقاتلات باش دير فيلمها وتسنات سنوات. ما دعمها حد فبلادها. نجحات بذراعها ومشات قلبات على الدعم فالخاريج. باش ربحات جائزة ف"كان" عاد ناضو خوتنا بغاو يركبو عليها. شوفو على كمامر.
هاد السينمائية باش ربحات "كان" حشماتهم. هزات راية بلادها. فتاخرات بمغربيتها واخا ما حصلات حتى على درهم من صندوق الدعم المخصص للانتاج السينمائي المغربي اللي كتشكل كل عام لجانو من قبل وزارة الاتصال
شي وحدين كياخدو هاد الدعم ما كيستاحقوش واللي كيستاحقو بحال المدير ما كياخدوش.
دابا حتى مهرجان مراكش او ادارتو ركبات على هاد الشي. ما كيعرضوش حتى عليها فالسابق باش دارت افلام. اليوم كلشي كيتسابق يتصور معاها. هي براسها قالت بعد اعلان اسمها باللي كانت كتشوف حفلات الاختتام فالتلفزيون.
كنهدر على دعوات للحضور. راها سبق ليها وشاركات فورشات الاطلس ديال مؤسسة مهرجان مراكش وخدات شي بركة باش دير افلامها هادي 4 سنين