أسماء المدير من البراد للنجمة الذهبية: بزز باش شديناها تبات هاد الليلة ودابا بغيت ننعس

المخرجة المبدعة أسماء المدير اللي ربحات البارح السبت 2 دجنبر 2023 النجمة الذهبية لمهرجان مراكش الدولي 20 عن فيلمها "كذب ابيض" هدرات بعد تسلمها على الحلم فالفوز بهاد النجمة الاولى فتاريخ السينما المغربية.
قالت باللي فالسابق كانت كتشوف حفل اختتام المهرجان فدارها وكتطلع فوق الطابلة وكتقول لباباها يعطيها البراد. يعني كتخايل راسها رابحة نجمة. واضافت باللي اليوم ها هي بين يديها نجمة ديال بصاح.
الحلم ولى حقيقة. ربحات النجمة. بعد الاختتام نشرات صورة ليها فالفراش والنجمة بين يديها. وكتبات "هاهي نجمتكم يا مغاربة تحاربنا على ودها. عشرين عام وهي غايبة"
وزادت ساخرة "بزز باش شديناها تبات هاد الليلة. حنا نحلفو وهي تحلف". المدير ما خلاتهاش تمشي "والو والله ما نتي خارجة هاد المرة من مطار المنارة. هذا جهدي عليكم". طبعا بعد هاد الفوز اللي قارناتو بتأهل المنتخب المغربي لنصف نهاية المونديال وعندها الحق٬ يمكن ليها تنعس وتستاحقها "انا دبا بغيت غا نعس" كيف سالات التدوينة ديالها فصفحتها على الفايس بوك