كشف البطل المغربي فالتايكواندو عمر لكحل انه كيعاني بزاف مع المسؤولين ديال الجامعة الملكية الملكية المغربية للتايكواندو، واتهمهم بأنهم دارو عليه مؤامرة لدرجة انه هاجر لكندا، بعدما كان الحلم ديالو يرفع الدرابو ديال المغرب عالميا. وقرر عمر لكحل لاعب المنتخب المغربي للتكواندو فئة أقل من 58kg وهو وصيف بطل العالم ووصيف بطل الألعاب الإسلامية ووصيف بطل ألعاب البحر الأبيض المتوسط، وبطل الألعاب الأفريقية ووصيف بطل الألعاب الأفريقية لعدة مرات، (قرر) فركع الرمانة ويكشف المستور، وفتصريح خاص لموقع "كود" خرج وتكلم على المعاناة ديالو، وقال: "قررت الهجرة لكندا باش نستقر فيها بسبب الإدارة التقنية ديال جامعة التايكواندو وبسبب مشاكل فالتسيير والتدبير فيها، و كنت ديما كنتشكا لرئيس الجامعة وكنطالب بأنني محتاج نتدرب فظروف احترافية ومزيانة ولكن كانت كتمارس عليا ضغوطات من طرف الإدارة التقنية السابقة اللي كانو فيها مسؤولين فرنسيين وجات هاد الضغوطات فوقت حساس ومع الاقصائيات الاولمبية 2020". عمر لكحل زاد وضح ووجه الاتهام ديالو بشكل مباشر لجامعة التكيواندو وقال: "جات مؤامرة من الجامعة باش نتعرض للضغوطات وأنني ما نتأهلش فنظرهم غنقدر نربح ميدالية أولمبية ويوليو فالمشاكل وهذا الشي كنت كنسمعو بودني فالفريق الوطني، والإضافة للضغوطات اللي تمارست عليا، فالتداريب والاستعدادات ما كانتش هي هاديك وما كانتش التحضيرات فبلاصة مزيانة، والإمكانيات ما كانتش متوفرة وكنا كنتشكاو لرئيس الجامعة ولكن هو كان كيتغاضا على هذا الشي". وزاد لكحل: "نفس المشكل كان كيوقع ليا مع الإدارة التقنية الحالية اللي فيها مسؤولين مغاربة، وديما سوء التسيير وما كايناش ادارة تقنية بالمعنى الحقيقي، وكيديونا نوجدو فالبطولات الرياضية اللي ما نقدرش نطور فيهم راسي وكيبقى النيفو ديالي فيهم محدود واخا أنا مقبل على المشاركة فتظاهرات كبار بزاف فكل عام، وهذا الشي خاصو استعدادات مزيانة باش نأدي الواجب تجاه بلادي، وكنت كندير اللي فجهدي وبمساعدة الوالدين ديالي لا ماديا لا معنويا واللي كانو ديما كيوصيوني وكيقولو ليا الحلم ديالنا نشوفك هاز علم المغرب وتشرف بلادك وتشرف سيدنا، وهذا كان الحلم ديالي حتى أنا وكنت باغي نجيب ميدالية اولمبية لبلادي ولكن هاد الناس حرموني من هذا الشي وضغطو عليا بطريقة غريبة بزاف". وكمل البطل المغربي: "آخر تظاهرة رياضية شاركت فيها كانت بطولة العالم فكوادا لاخارا فالمكسيك 2022، وتعرضت لمشاكل بزاف، وعطاوني الفيديراسيو وعود بلي قبل بطولة العالم غتكون بريباراسيو فالأردن وتركيا ولكن دازت الوقت ولقيت راسي بلا استعدادات وأقل حاجة خاص تكون عندي هي ندخل للسونطر نوجد ونخرج غير الويكاند نشوف واليديا، وما كيناش السويفي وكنا كنتخلصو ب 50 درهم النهار، اللي هو مبلغ ما يقدرش يغطي ليا على المتطلبات ديالي اليومية حيث أنا رياضي وعندي متطلبات خاصة باش نحافظ على اللياقة البدنية ديالي ونوجد راسي". البطل المغربي اكد انه توصل بعروض من دول اخرى باش يمثل المنتخبات ديالها فرياضة التايكواندو، ولكن هو متشبث باش يلعب للمغرب وقال: "جاوني عروض باش نمثل منتخبات اخرى ودابا عندي جوج بلدان باغييني نلعب معهم ورسميين، ولكن هذا قرار صعيب بزاف عليا حيث أنا الهدف والهم ديالي فالحياة هو نفرح الوالدين ديالي اللي باغييني نلعب للمغرب".