كيفاش القضاء فتح تحقيق على تدوينة مجهولة ضد الريسوني وشكوك على عمر الراضي ولحد الان مازال ما فتح والو على ما قالتو مايسة واكدو لمرابط ضد شامة باللي عميلة مع الموساد باسم "تشاكو"

يوم 7 نونبر اللي فات خرجات مايسة سلامة الناجي مع حميد المهداوي ففيديو وقالت مما قالت باللي شامة درشول اللي مرة كتقدم راسها خبيرة فالاعلام مرة خبيرة ف"القوة الناعمة". مايسة قالت وهي واعية اش كيعني خبار بحال هادي باللي شامة عميلة مع اسرائيل واسمها الحركي "تشاكو".
علي لمرابط الصحافي المعروف واللي معروف عليه الصرامة فتمحيص لخبار٬ اكد من بعد باللي اللي كشفاتو مايسة سلامة الناجي عن "تشاكو" ما كيمثلش حتى 20 بالمائة من الحقيقة. اي القضية اكثر خطورة مما يقدرو يتصورو لمغاربة.
شهر كامل على هاد لخبار المزلزل. شهر وما شفنا لا فتح تحقيق ولا هم يحزنون. هادي قضية امن دولة ماشي قضية صغيرة. شهر كامل داز وملايين لمغاربة شافو هاد المقطع. فاليوتوب. فالواتساب. بارطاجاوه بيناتهم.
التحقيق غادي يوصلنا واش اتهامات مايسة لشامة مبنية على شي ساس ولا اتهامات ما شاداش. القضاء اللي خاصو يحسم فهاد الملف. غادي ينصف الاطراف.
الغريب والمثير وسميوه اللي بغيتو هو ان حتى شي تحقيق ما تفتح لحد الان. لا فتح قضائي ولا غيرو.
شفنا كيفاش تعامل القضاء فقضية الصحافي سليمان الريسوني. تفتح تحقيق فاللول على تدوينة مجهولة. الباقي عارفينو. حتى قضية الصحافي عمر الراضي بدات بشكوك قبل ما يتحكم عليهم بجوج بالسجن. وبجوجهم مازال فالحبس.
دابا هادي وحدة =مايسة= خارجة كتقول بلغة يقينية باللي شامة جاسوسة لاسرائيل وعندها اسم حركي. وهادي بوحدها راه توصل لقطع العلاقات الديبلوماسية بين الدول. عليه ما مفهومش علاش ما تحركاتش النيابة العامة فقضية على قدر كبير من الحساسية. الصحافة حتى هي داخلة فهاد الفيلم وبزاف.
خاص النيابة العامة تفتح تحقيق. هادا ماشي لعب ديال تعايرني نعايرك. هادا ما كيهمش مسؤول سامي او اخر. هادا كيهم لبلاد كلها. فيها جاسوسية وتجنيد وتهديد وافعال العصابات. القضاء بوحدو يقدر يفرز الحقيقة من الاتهامات اللي ما عندها ساس