فضيحة.. كيفاش واحد تابع لولد الرشيد موقف عام بسباب الإختلالات المالية فعصبة العيون يربح ويولي رئيسها؟

لاحديث فالعيون إلا عن واحد التابع لولد الرشيد سميتو محمد رويجل لي ربح رئاسة عصبة جهة العيون الساقية الحمراء لكرة القدم.
هاد محمد رويجل بقا هو المرشح الوحيد لرئاسة العصبة الجهوية العيون الساقية الحمراء لكرة القدم بعدما تراجعات واحد المرشحة أخرى نائبة برلمانية بالزهر مع حزب الإستقلال وخلاتو بوحدو.
الغريب فهاد الشي هو أن الفائز برئاسة لعصبة لي ديجا كان كاتب عام ديالها محمد رويجل ديجا صدر فحقو توقيف لمدة سنة كاملة موقوفة التنفيذ وغرامة 5 مليون سنتيم فأكتوبر الماضي من طرف لجنة الأخلاقيات لتابعة للجامعة الملكية المغربية لكرة القدم، هو ومجموعة من المسيرين الرياضيين بحال رئيس العصبة السابق محمد بنعويس، ونائي أمين المال محمد المساوي بسباب إختلالات فالتدبير المالي والإداري فالعصبة، يغني هوما كليكا كلها توقفات من الرئيي للكاتب العام لنائب أمين المال.
السيد صادر فحقو قرار التوقيف وغرامة مالية فاش كان كاتب عام بسباب التخربيق المالي ودازت 3 شهور لقيناه رئيس ديال العصبة گاع، كيفاش ؟ ما نعرف. غير هو من المهم نعرفو أنه ديال ولد الرشيد.
العصبة ديال الفوت فالعيون عامرة تخربيق وتخلويض ونفس الوجوه كدور على المناصب وعلى المسؤوليات. هادشي بزاف وخاص يتفتح تحقيق جنائي ولي فرط يكرط وحتى الجامعة خاصها تدخل على الخط وتسالي مع هاد الكمامر لي لقات فكرة القدم فالعيون بقرة كتحلب منها وقاضية بيها غراض بلا ما تكون حتى رقابة جنائية بعيد على العقوبات الإدارية.