صراع الجبابرة فالعيون.. ملاسنات بين ولد الرشيد والدرهم فدورة مجلس الجهة وسيرة الحبس والفساد تجبدات

شهدت الدورة العادية لمجلس جهة العيون الساقية الحمراء لشهر أكتوبر 2023 والمنعقدة يوم الاثنين سجال واصطدام كبير لأول مرة كيعرف مجلس جهة العيون الساقية الحمراء بحالو.
هاد الاصطدام كان بين جوج وهوما عضوي الجهة مولاي حمدي ولد الرشيد وحسن الدرهم وكان اصطدام خرج عن سياقو وتحول لمعركة كلامية وملاسنة مباشرة أول مرة كتكون ما بين هاد الجوج منتخبين لي بيناتهوم بزاف ديال الضواسا لي عالقة وفيها ماهو مبني على الصراع السياسي ولي مبني على النفوذ ولي مبني على التصاور والظهور الإعلامي.
البداية ديال هاد الملاسنة كانت فتعقيب ديال العضو عن حزب التجمع الوطني للأحرار حسن الدرهم لي قدم تعقيب على مسألة الميزانية والأرقام الكبيرة لي فيها، ولي اعتابر أنها مبالغ فيها، وفيها گونفلاج وقال إن هاد ملايين الدراهم لي مخصصة للجانب الاجتماعي والإنساني ماكتمشيش فعلا للساكنة. الهدرة ديال حسن الدرهم كانت قاصحة وكان باين أنها موجدة وباغيها تخرج للإعلام بحكم أن العضو لي حداه كان موجد التيليفون تحت الدف باش يصور ويوزع الفيديو ولي هو من نفس الحزب وكيتعلق الامر بالعضو عن حزب التجمع الملقب ب "دينو" لي ديجا عائلتو عندها مشاكل مع عائلة ولد الرشيد من يامات خليهن ولد الرشيد.
حسن الدرهم خدا التعقيب وعلق وهادشي يكفله القانون وقدم ملاحظاتو على هاد الميزانية لي ملايين الدراهم فيها غير مشتتة فوقت وزارة الداخلية كتدعو للتقشف على حساب ما قال، ولكن من بعد خدا مولاي حمدي ولد الرشيد التعقيب وعلق وهدر على شكون هو فريق المعارضة فالجهة دخل حسن الدرهم على الخط وقاطع ولد الرشيد، وهادشي ما كانش من حقو، وبدات المشاحنة مع ولد الرشيد ولي تطورات بزاف وتحولات لغوات وردود فعل بعيدة على اللباقة المطلوبة.
السجال لي كان عكس صورة خايبة على صراع النفوذ فجهة العيون الساقية الحمراء، وخلات مولاي حمدي ولد الرشيد يجيب سيرة المحكمة والحبس لحسن الدرهم فإشارة للضواسا لي عندو، وفالمقابل حسن الدرهم جبد مسألة أن كلشي فالعيون كيعرف ولدوالرشيد اش كيديرو فإشارة للفساد لي كاين على حساب ما فهمو الناس.
كاين صراع كبير بين ولد الرشيد وحسن الدرهم وهاد الصراع ماشي وليد اليوم أو البارح ولكن كان عقود هادي وسبابو بسط النفوذ على المنطقة، ولكن رجع للواجهة من بعد الانتخابات وبدا فاش حسن الدرهم بدا كيدير فيديوات على التدبير ديال مجلس جهة العيون وخرج فمجموعة من المنابر باش يستهدف ولد الرشيد.
ولد الرشيد من جانبو وفخضم هاد الخرجات ديال حسن الدرهم ختار يسكت وكلشي كيعرف علاش سكت ولد الرشيد، سكت لأنه ولا كيشوف حسن الدرهم أقل منو. أقل منو فلوس أقل منو نفوذ أقل منو فبزاف ديال الأمور، ولكنه تفرگع فالدورة ديال مجلس الجهة وهادشي كيبين بأنه ما بقاش قابل تصرفات حسن الدرهم. خاصة وأنه ما كاين حتى دليل مادي يدين ولد الرشيد.
عدد ديال المتابعين ديال الوضع فجهة العيون كيعتابرو خرجات حسن الدرهم كدخل فإطار حفظ مكان ليه فالساحة من خلال الإعلام والتركيز على ترويج صورة المدافع عن الساكنة، ولكن قبل هادشي خاصو يفك شحال ديال الضواسا لي عندها علاقة بالفلوس ولي باقة تابعاه من نهار كان رئيس ديال جماعة المرسى واستقال وخرج منها والقضية خدات أبعاد فيها محاكم وسبهات تبذير أموال وفساد.
ليام الجاية ما غاديش دوز هكاك ويمكن تكون فيها شي حوايج خرين. فحالة هدر حسن الدرهم على الفساد خاصو يجيب الدليل والنيابة العامة تدخل على خط والقانون ياخد مجراه ولي فرط يكرط وإذا ثبت العكس فهو براسو خاصو يتحاسب، وأيضا المجلس الأعلى للحسابات خاصو يدخل على الخط ويدقق فميزانية العيون ويتبعها باش نعرفو آش واقع.