[email protected] تداول رواد منصات التواصل الإجتماعي بحال "تيكتوك" ومستعملي تطبيقات التراسل الفوري بحال "واتساب" فالصبليون فيديو دياب رئيس الحكومة الإسبانية، بيدرو سانشيث، كيعلن فيه منح المغاربة اللي عايشين فالصبليون مساعدات مالية. الفيديو اللي تم التلاعب به كيقول قيه بيدرو سانشيث: "إذا كنت مغاربيًا، فأنت مهتم بهذه المساعدة.. أيها الشعب المغربي، أردت أن أخبركم أنه في عام 2024 سنقدم مساعدة قدرها 2000 يورو لكل شخص موجود هنا في إسبانيا. لا يهم إذا كان لديك أوراق أم لا، لأن هذه المساعدة للجميع. وأيضا مساعدة قدرها 3000 يورو لكل شخص لديه طفل. على سبيل المثال، إذا كان لديك طفلان فستكون 6000 يورو، وإذا كان لديك ثلاثة فستكون 9000 يورو. وأيضا مساعدة في رمضان حتى تتمكن من شراء ما تحتاجه من طعام وأشياء أخرى. وهذه المساعدات مخصصة لشعب المغرب فقط". هاد الفيديو الفالصو دار روينة فمنصات التواصل الإجتماعي، ولكن للسؤال اللي كاين هو علاش تم التلاعب وترويجو فهاد الظرفية بالضبط ؟ كاين طرف ثالث ورابع وخامس وسادس كيهمو أنه يشوه صورة بيدرو سانشيث واخا بإستعمال التدليس، وإذا بحثنا شوية غادي نلقاو أن بزاف ديال الأطراف باغة تشوش عليه بحال المعارضة بقيادة الحزب الشعبي الإسباني والجزائر والبوليساريو، علما بأن هاد الأطراف عندها قاسم مشترك واحد وهو انها تضرب سانشيث بسباب التقارب والتناغم اللي كاين دابا فعلاقات إسبانيا والمغرب على كل المستويات وخاصة فيما يتعلق بنزاع الصحرا. الهدرة اللي قال سانشيث فشريط الفيديو على حساب ماقالت وسائل إعلام إسبانيا، مأخوذة ومركبة من خطابو فالجلسة الأولى لمناظرة تنصيب بيدرو سانشيز، في 15 نونبر الماضي، بالإضافة للحوليج اللي بان بيهم، وبالطبع ما هدر فهاديك الجلسة على حتى شي مساعدات للمغاربة وماشي من حقو ولا مسؤوليتو.
