كيفاش ممكن يربحو الاسود "الكان"؟ النجم الكبير النايبت يعطي ل"كود" الوصفة: الواقعية. سايس. التأقلم. المشجع

العميد السابق للمنتخب المغربي لكرة القدم واحد كبار لاعبي الاسود سابقا نور الدين النايبت حاضر فالكان الايفواري هاد الدورة كواحد من 24 لعاب كبير اختارهم الكاف للترويج لكرة القدم. لعاب دوزها سواء مع الوداد او المنتخب او فالصبليون او النگليز. قبل ماتش المغرب ضد تانزانيا فاول ماتشات المجموعة 6 لهاد الدورة ديال كأس افريقيا للامم تلاقات "كود" بهاد اللعاب العاشق للحياة.
سولاتو "كود" كيفاش ممكن للاسود يربحو الكاس اللي كنتسناوها من اواخر السبعينات. نايبت بتجربتو لكبيرة اكد ل"كود" باللي اول ما يمكن يديرو المنتخب هو يتعامل مع كل ماتش تعامل خاص. كيفاش؟ يشرح ل"كود" باللي ايلى لعبنا مع تانزانيا خاصنا نفكرو غير فمواجتها. نوجدو ليها كلشي باش ناخدو 3 نقاط. بللي ما خاص اللعابة ينساو ماتشات الكونگو وزامبيا. ينساو اللي داز واللي جاي. يفكرو فالماتش ويوجدو خطة مبنية على طريقة لعب الخصم.
النايبت كيهدر على تجربة. عارف ان التفكير فالدورة. فالفوز بالكاس غادي يخلي اللعابة يخرجو من الكان. هاد الشي وقع للاسود فدورات سابقة. منتخب لعب نصف نهاية كأس العالم الاخير بقطر بحال هاد التفكير كيقدر يهمين عليه بزاف.
الماتش الاول ضد تانزانيا واللي سالى ب3 لزيرو للاسود٬ بين باللي مركزين على كل ماتش ماتش. المدرب وليد الركراكي كيردد هاد التصور للي قدمو ل"كود" النايبت.
فسؤال ل"كود" على دور العميد رومان سايس وعلى ثقلو فاللعب٬ رد النايبت اللي كيعرف هاد المركز مزيان مزيان٬ باللي العميد "ما خاصوش غير يلعب مزيان وصافي" وباللي سايس عندو مسؤوليات كثيرة "كعميد وقلب الدفاع هو اللي يعطي الثقة للعابة كلهم". واضاف "كنهدر على بوسط بحال ديال سايس. فالماتش الاول كان قائد ودار ماتش مزيان. المنتخب كولو كان مرتاح حقاش القائد عطاهم الثقة".
بخصوص لعابة مغاربة مكونين فاوربا وكيفاش يتأقلمو مع الاجواء الافريقية وتأثير ذلك على حظوظنا نربحو الكاس٬ قال النايبت ل"كود" باللي كتكون صعوبة فاللعب هنا٬ لكنو اضاف باللي ايلي نجحو اللعابة فالتعايش مع هاد الاجواء الافريقية فغاديين يمشيو بعيد فهاد الكاس وبعدها غادي يعاونهم بزاف فمسيرتهم فاوربا. النايبت قدم صورة معبرة ل"كود" علي هاد الشي "ايلي لعبتي فافريقيا مزيان راك تقدر تلعب بالسمونيك فاوربا".
كاينة نقطة ايجابية جبدها النايبت فحديثو مع "كود" كتعلق بحضور الجمهور. النايب كيذكر باش كان مع المنتخب كيلعبو "الكان" او ماتشات مؤهلة ليه وللمونديال وللاولمبياد٬ ما كانش حضور الجمهور المغربي "دابا كاين جمهور فالكوت ديفوار فالتيران. باش تدخل للتيران وتشوف الجمهور راه شعور واعر. باش كنا نلعبو ما كانش كيكون الجمهور ولا كان كيكون قليل بزاف بزاف. اليوم كتشوف اعداد كبيرة. راه كيأثر فاللعابة بزاف".
نتمناو هاد التأثير يبان فباقي الماتشات ونلعبو 7 الماتشات كيف درنا فكأس العالم ولكن نجيبو الكاس ماشي نلعبو الترتيب.