2 مغاربة جاتهم الملاريا فسان بيدرو فين كاين المنتخب والجماهير المغربية.. ومسؤول طبي ل گود: ها حالتهم كيف دايرا والمرض كيدور

تصابو 2 مغاربة بالملاريا فمدينة سان بيدرو الايفاورية فين كاين المنتخب الوطني المغربي كيلعب ماتشات كوب دافريك، وهي المدينة اللي فيها المشجعين المغربة بزاف.
وكشف گاري المسؤول الطبي هنا فسان بيدرو الايفوارية، فتصريح خاص لموقع "گود" أن 2 مغاربة جاتهم الملاريا، وتبين هذا الشي بعدما تم استقبالهم فمركز طبي كاين فالبور ديال سان بيدرو ودارو لهم التحاليل اللازمة.
وحسب المسؤول الطبي فسان بيدرو فالمغربي الاول جا للمركز الطبي البارح الخميس، وعطاوه الدوا ضد الملاريا ولا بخير، والمغربي الثاني جا اليوم الجمعة للمركز الطبي وتبين بعد التحاليل اللي دار انه مصاب بالملاريا وراه كيعالجو فيه.
الدكتور گاري، اكد بلي الملاريا مرض شائع هنا فمدينة سان بيدرو، وخاص الاحتياط منو وان الواحد خاصو يرش بالرشاش الواقي من شنيولة اللي كتنقل المرض بين البشر، ويبعد الإنسان من القوادس ولبس اللون لكحل اللي عزيز على شنيولة.
وشدد المسؤول الطبي انه فحالة الإحساس بالأعراض ديال الملاريا وهي السخانة والرضان ولادياري خاصو يمشي دغيا لعند الطبيب سوا فالمركز الطبي اللي كان فالبور ديال سان بيدرو، او يمشي للمرمز الطبي الجهوي ديال سان بيدرو، باش يدير التحاليل ويعرف واش الملاريا او لا وياخد العلاج إلا كان مريض.