ماتش الاسود ضد زامبيا ماتش الثقة باش نمشيو لياماسكرو وبواكي ونرجعو لابيدجان. الخلف مضمون والرومبلاسون مزيانين: ريتشاردسون دار ماتش كبير وعبد الحميد ترفع عليه الظلم

البارح لاربعا 24 يناير 2024 ماشي غير تأهل المنتخب المغربي لكرة القدم لدور الثمن فكأس افريقيا للامم بالكوت ديفوار بعد ما ربح زامبيا لواحد لزيرو وجا الاول فالمجموعة السادسة. البارح جرب المدرب وليد الركراكي لعابة جداد غاديين يكونو الخلف.
دخل اول مرة فهاد الكان لعاب كان شبه رسمي فالمونديال وهو عطية الله. دار ماتش كبير. دابا عندنا عطية الله والشيبي فانتظار لعاب اخر كبير هو مزراوي يصح. كان واجد هاد الماتش ولكن ما بغاش يغامر بيه المدرب ويمكن يخليه للثمن او الربع ايلى تأهلو.
عطية الله كيف عادتو دار ماتش كبير بزاف البارح فملعب مدينة سان بيدرو.
لكن اللعاب اللي كلشي تسناه هو يونس عبد الحميد لاعب مونبوليي٬ اللي عوض العميد غانم سايس. دار ماتش بلا اخطاء تقريبا. دار خدمتو كيف خاصها دار. فماتش البارح تفاهم مع نايف اكرد ومع حكيمي ومع عطية الله ومع امرابط سفيان.
وجود مدافع بحال عبد الحميد كيعطي الثقة للمنتخب. تقدر تحتاجو فشي ماتشات توقع فيهم امور بحال الطرد او الاصابة. عبد الحميد فرجلو حقاش كيلعب كاع ماتشات الفرقة ديالو. هادا مهم بزاف فكومبيتيسيون بحال هادي.
لعاب اخر فبوسط مهم بزاف دخل البارح فالشوط الثاني ودار ماتش كبير هو ريتشاردسون. لعاب كيعطي كونفيونس ماشي غير للعابة حتى للجمهور. عندو هدوء ماشي ديال لعاب فسنو بل لعاب عندو تجربة كبيرة فافريقيا.
قبل ما يدخل كان مشكلة فالوسط. الصيباري ما لعبش بلاصتو وتلف فالشوط الثاني بعد ما لعب شوط اول متوسط٬ ولكن غير دخل ريتشارسون ورجعات الثقة للمنتخب. هو الخليفة للاعب المهم بزاف فالوسط املاح. هاد اللعاب اللي كيقوم بدور كبير فالوسط الدفاعي واللي ما كيبانش حتى باش ما يكونش ويتماركى علينا لبيوتا.
دابا مع هاد اللعاب ريتشاردسون عند الركراكي على من يعول. كان ممكن يجرب المدرب نجم اخر جاي فالطريق هو العزوزي باش يلعب فبلاصة امرابط ويخليه يرتاح شوية٬ ولكن المدرب يمكن فضل يخلي نجم المنتخب المغربي يدير توازن فهاد التشكيلة.
الصيباري ممكن يعطي احسن كون لعب فبلاصتو مع ايندهوفن٬ لكن المدرب من حقو يجرب لعابة فبلايص كيبان ليه محتاجهم.
فالهجوم كان تغيير للنصيري بالكعبي وتيسودالي. مزيان يجرب. طبعا تبقى هاد لبلاصة حكر للنجم النصيري. شفنا البارح كيفاش لا الكعبي ولا تيسودالي ربحو شي مواجهات مع مدافعي زامبيا. هنا تفهم علاش النصيري نجم كبير.
اللي كيبان خرج من حسابات الركراكي٬ انطلاقا من ماتش البارح٬ هو امين حاريث. ما دخلوش ما لعبوش. واش غادي يعتامد عليه فالماتشات اللي جايين؟ كيبان موحالش.
دابا الركراكي عندو فرقة يقدر يلعب بيها فيها بونو وعطية الله =فانتظار عودة مزراوي= وحكيمي ونايف وسايس واملاح وامرابط وزياش واوناحي والنصيري وبوفال او الزلزولي وعندو بدائل فالدفاع مزيانين بحال الشيبي وعبد الحميد رياض شادي ولعابة مزيانين فالوسط الدفاعي بحال العزوزي وريتشارسون وفالوسط الهجومي بحال الخنوس والصيباري وحاريث وفالهجوم بحال تيسودالي والكعبي وحتى فالحراسة بحال الحارس امحمدي. يعني كاين باش تمشي بعيد فهاد الكاس. تلعب فسان بيدرو وتمشي لياماسوكرو وتكمل لبواكي وترجع نهار 11 تلعب فابيدجان